ਬਿਓਰੋ। ਪੰਜਾਬੀ ਗਾਇਕ ਲੈਂਬਰ ਹੁਸੈਨਪੁਰੀ ਵਿਵਾਦਾਂ ‘ਚ ਫਸ ਗਏ ਹਨ। ਲੈਂਬਰ ‘ਤੇ ਉਹਨਾਂ ਦੀ ਪਤਨੀ, ਬੱਚਿਆਂ ਅਤੇ ਸਾਲੀ ਨੇ ਕੁੱਟਮਾਰ ਕਰਨ ਦਾ ਇਲਜ਼ਾਮ ਲਾਇਆ ਹੈ। ਲੈਂਬਰ ਦੀ ਪਤਨੀ ਨੇ ਘਰ ਦੇ ਬਾਹਰ ਕਰੀਬ 2 ਘੰਟਿਆਂ ਤੱਕ ਹੰਗਾਮਾ ਵੀ ਕੀਤਾ। ਦੱਸ ਦਈਏ ਕਿ ਲੈਂਬਰ ਜਲੰਧਰ ਦੇ ਦਿਓਲ ਨਗਰ ‘ਚ ਰਹਿੰਦੇ ਹਨ, ਜਿਥੇ ਇਹ ਪੂਰਾ ਵਿਵਾਦ ਹੋਇਆ।
ਲੈਂਬਰ ਹੁਸੈਨਪੁਰੀ ਦੀ ਸਾਲੀ ਰਜਨੀ ਦੇ ਮੁਤਾਬਕ, ਉਹਨਾਂ ਦਾ ਘਰ ਵੀ ਲੈਂਬਰ ਦੇ ਘਰ ਦੇ ਸਾਹਮਣੇ ਹੀ ਹੈ। ਉਹਨਾਂ ਨੇ ਦੱਸਿਆ ਕਿ ਲੈਂਬਰ ਨੇ ਘਰ ‘ਤੇ ਕਿਰਾਏਦਾਰ ਰੱਖਣੇ ਸਨ, ਜਿਸ ਬਾਰੇ ਕੁਝ ਲੋਕਾਂ ਨੂੰ ਕਿਹਾ ਗਿਆ ਸੀ। ਸੋਮਵਾਰ ਸ਼ਾਮ ਨੁੂੰ ਕਿਰਾਏਦਾਰ ਘਰ ਵੇਖਣ ਲਈ ਆਏ, ਤਾਂ ਲੈਂਬਰ ਨੇ ਇਲਜ਼ਾਮ ਲਗਾਇਆ ਕਿ ਉਹ ਗਲਤ ਆਦਮੀ ਲੈ ਕੇ ਆਈ ਹੈ। ਉਹਨਾਂ ਨੇ ਇਲਜ਼ਾਮ ਲਾਇਆ ਕਿ ਲੈਂਬਰ ਆਪਣੇ ਸਾਥੀਆਂ ਨੂੰ ਲੈ ਕੇ ਆਏ, ਹਥਿਆਰ ਲਹਿਰਾਏ ਅਤੇ ਬੁਰੀ ਤਰ੍ਹਾਂ ਨਾਲ ਸਾਰਿਆਂ ਦੀ ਕੁੱਟਮਾਰ ਕੀਤੀ। ਇਲਜ਼ਾਮ ਹੈ ਕਿ ਲੈਂਬਰ ਨੇ ਆਪਣੀ ਪਤਨੀ, ਸਾਲੀ, ਬੱਚਿਆਂ ਅਤੇ ਦੂਜੇ ਸ਼ਹਿਰ ਤੋਂ ਇਲਾਜ ਕਰਵਾਉਣ ਲਈ ਆਈ ਦੂਜੀ ਸਾਲੀ ਨੂੰ ਵੀ ਕੁੱਟਿਆ।
ਕੁੱਟਮਾਰ ਦੇ ਇਲਜ਼ਾਮ ਬੇਬੁਨਿਆਦ- ਲੈਂਬਰ
ਓਧਰ, ਲੈਂਬਰ ਹੁਸੈਨਪੁਰੀ ਨੇ ਸਾਰੇ ਇਲਜ਼ਾਮਾਂ ਨੂੰ ਬੇਬੁਨਿਆਦ ਦੱਸਿਆ ਹੈ। ਲੈਂਬਰ ਨੇ ਦੱਸਿਆ ਕਿ ਉਹਨਾਂ ਦੀਆਂ 3 ਸਾਲੀਆਂ ਹਨ। ਉਹਨਾਂ ਦੀ ਪਤਨੀ ਆਪਣੀ ਛੋਟੀ ਭੈਣ ਦੀਆਂ ਗੱਲਾਂ ‘ਚ ਆ ਕੇ ਵਿਵਾਦ ਕਰਨ ਲੱਗੀ ਹੈ। ਸੋਮਵਾਰ ਨੂੰ ਪਰਿਵਾਰ ਵਾਲਿਆਂ ਨੇ ਕੁਝ ਲੋਕਾਂ ਨੂੰ ਘਰ ਬੁਲਾਇਆ। ਉਹਨਾਂ ਨੇ ਘਰ ‘ਚ ਲਗਾਏ ਆਪਣੇ ਕੈਮਰੇ ਜ਼ਰੀਏ ਦਫਤਰ ‘ਚ ਬੈਠੇ ਸਭ ਵੇਖ ਲਿਆ ਸੀ। ਉਹ ਘਰ ਪਹੁੰਚੇ ਅਤੇ ਕਿਹਾ ਕਿ ਅਣਜਾਨ ਲੋਕਾਂ ਨੂੰ ਘਰ ਕਿਉਂ ਬੁਲਾਇਆ ਹੈ, ਤਾਂ ਉਹਨਾਂ ਦੀ ਸਾਲੀ ਹੱਥ ਚੁੱਕਣ ਲੱਗੀ ਅਤੇ ਕੱਪੜੇ ਵੀ ਫਾੜ ਦਿੱਤੇ।
ਜਾਂਚ ਤੋਂ ਬਾਅਦ ਹੋਵੇਗੀ ਕਾਰਵਾਈ- ਪੁਲਿਸ
ਥਾਣਾ ਭਰਗਵ ਕੈਂਪ ਦੇ ਇੰਚਾਰਜ ਭਗਵੰਤ ਸਿੰਘ ਭੁੱਲਰ ਨੇ ਦੱਸਿਆ ਕਿ ਸ਼ਿਕਾਇਤ ਆਈ ਹੈ। ਘਰੇਲੂ ਵਿਵਾਦ ਹੈ, ਜਿਸਦੇ ਚਲਦੇ ਦੋਵੇਂ ਪੱਖਾਂ ਨੂੰ MLR ਦੇ ਨਾਲ ਆ ਕੇ ਬਿਆਨ ਦੇਣ ਲਈ ਕਿਹਾ ਗਿਆ ਹੈ। ਬਿਆਨਾਂ ਤੋਂ ਬਾਅਦ ਬਣਦੀ ਕਾਰਵਾਈ ਕੀਤੀ ਜਾਵੇਗੀ।
