ਬਿਓਰੋ। ਕਰੀਬ ਇੱਕ ਮਹੀਨੇ ਦੀ ਸ਼ਾਂਤੀ ਤੋਂ ਬਾਅਦ ਪੰਜਾਬ ਕਾਂਗਰਸ ਵਿੱਚ ਵੱਡਾ ਸਿਆਸੀ ਭੂਚਾਲ ਆਇਆ ਹੈ।ਇਹ ਲੜਾਈ ਪਹਿਲਾਂ ਤੋਂ ਵੀ ਕਿਤੇ ਵੱਧ ਤਿੱਖੀ ਹੈ। ਦਰਅਸਲ 4 ਮੰਤਰੀਆਂ ਸਣੇ ਕਰੀਬ 30 ਵਿਧਾਇਕਾਂ ਨੇ ਇੱਕ ਬੈਠਕ ਕਰਕੇ ਸਿੱਧੇ ਤੌਰ ‘ਤੇ ਕੈਪਟਨ ਨੂੰ ਹਟਾਉਣ ਦੀ ਮੰਗ ਕਰ ਦਿੱਤੀ ਹੈ।
ਬਗਾਵਤ ਦੇ ਪਿੱਛੇ ਕੌਣ?
ਮੰਨਿਆ ਜਾ ਰਿਹਾ ਹੈ ਕਿ ਮੰਤਰੀਆਂ ਤੇ ਵਿਧਾਇਕਾਂ ਦੀ ਇਸ ਬਗ਼ਾਵਤ ਦੀ ਸਕ੍ਰਿਪਟ ਕਾਂਗਰਸ ਭਵਨ ਵਿੱਚ ਤਿਆਰ ਹੋਈ ਹੈ ਯਾਨੀ ਨਵਜੋਤ ਸਿੱਧੂ ਦੇ ਦਰਬਾਰ ਵਿੱਚ। ਦਰਅਸਲ, ਕੈਪਟਨ ਦੇ ਖਿਲਾਫ ਅਵਾਜ਼ ਚੁੱਕਣ ਵਾਲੇ ਸਾਰੇ ਮੰਤਰੀ ਅਤੇ ਵਿਧਾਇਕ ਉਹ ਹਨ, ਜੋ ਬਦਲੇ ਸਮੀਕਰਨਾਂ ਵਿੱਚ ਸ਼ੁਰੂ ਤੋਂ ਹੀ ਸਿੱਧੂ ਦੇ ਨਾਲ ਖੜ੍ਹੇ ਨਜ਼ਰ ਆ ਰਹੇ ਹਨ। ਹਾਲਾਂਕਿ ਇਸ ਬਗ਼ਾਵਤੀ ਬੈਠਕ ਵਿੱਚ ਸ਼ਾਮਲ ਵਧੇਰੇਤਰ ਵਿਧਾਇਕ ਖੁੱਲ੍ਹ ਕੇ ਸਾਹਮਣੇ ਨਹੀਂ ਆਏ।
ਹਾਈਕਮਾਂਡ ਨੂੰ ਰਿਪੋਰਟ ਭੇਜਣਗੇ ਸਿੱਧੂ
ਕੈਪਟਨ ਦੇ ਖਿਲਾਫ ਬਾਗੀ ਤੇਵਰ ਦਿਖਾਉਣ ਵਾਲੇ ਮੰਤਰੀ ਪ੍ਰੈੱਸ ਕਾਨਫਰੰਸ ਤੋਂ ਬਾਅਦ ਸਿੱਧੇ ਕਾਂਗਰਸ ਭਵਨ ਪਹੁੰਚੇ, ਜਿਥੇ ਉਹਨਾਂ ਨੇ ਸਿੱਧੂ ਦੇ ਨਾਲ ਲੰਮੀ ਚਰਚਾ ਕੀਤੀ। ਖੁਦ ਸਿੱਧੂ ਨੇ ਟਵੀਟ ਕਰਕੇ ਇਸਦੀ ਜਾਣਕਾਰੀ ਦਿੱਤੀ ਅਤੇ ਕਿਹਾ ਕਿ ਉਨ੍ਹਾਂ ਨੇ ਤ੍ਰਿਪਤ ਬਾਜਵਾ ਦੀ ਅਪੀਲ ‘ਤੇ ਐਮਰਜੈਂਸੀ ਬੈਠਕ ਕੀਤੀ ਅਤੇ ਜਲਦੀ ਹੀ ਹਾਈਕਮਾਂਡ ਨੂੰ ਪੂਰੇ ਹਾਲਾਤ ਦੀ ਜਾਣਕਾਰੀ ਦਿੱਤੀ ਜਾਵੇਗੀ।
Got a call from Tripat Bajwa ji asking for an emergency meeting… Met him along with other colleagues at the PPCC office.
Will appraise the high command of the situation. pic.twitter.com/n98QacvQhd— Navjot Singh Sidhu (@sherryontopp) August 24, 2021
ਹਾਈਕਮਾਂਡ ਨੇ ਵੀ ਸੰਭਾਲਿਆ ਮੋਰਚਾ
ਮੰਤਰੀਆਂ ਤੇ ਵਿਧਾਇਕਾਂ ਦੇ ਇਨ੍ਹਾਂ ਬਾਗ਼ੀ ਤੇਵਰਾਂ ਨੂੰ ਲੈ ਕੇ ਹਾਈਕਮਾਂਡ ਵੀ ਹਰਕਤ ਵਿਚ ਹੈ। ਪੰਜਾਬ ਕਾਂਗਰਸ ਇੰਚਾਰਜ ਹਰੀਸ਼ ਰਾਵਤ ਨੇ ਨਰਾਜ਼ ਮੰਤਰੀਆਂ ਨਾਲ ਫੋਨ ‘ਤੇ ਗੱਲ ਕਰਕੇ ਪੂਰੀ ਜਾਣਕਾਰੀ ਲਈ ਹੈ। ਹਾਲਾਂਕਿ ਹਰੀਸ਼ ਰਾਵਤ ਨੇ ਮੀਡੀਆ ਨਾਲ ਗੱਲਬਾਤ ਕਰਦੇ ਹੋਏ ਸਭ ਕੁਝ ਠੀਕ ਹੋਣ ਦਾ ਦਾਅਵਾ ਕੀਤਾ ਅਤੇ ਕਿਹਾ ਕਿ ਕਿਸੇ ਨੇ ਵੀ ਲੀਡਰਸ਼ਿਪ ਵਿੱਚ ਬਦਲਾਅ ਦੀ ਗੱਲ ਉਨ੍ਹਾਂ ਦੇ ਸਾਹਮਣੇ ਨਹੀਂ ਰੱਖੀ ਹੈ।
ਮੰਨਿਆ ਜਾ ਰਿਹਾ ਹੈ ਕਿ ਬੁੱਧਵਾਰ ਨੂੰ ਇਹਨਾਂ ਨਾਰਾਜ਼ ਮੰਤਰੀਆਂ ਨੂੰ ਦਿੱਲੀ ਸੱਦਿਆ ਗਿਆ ਹੈ, ਜਿਥੇ ਸੋਨੀਆ ਗਾਂਧੀ ਤੋਂ ਪਹਿਲਾਂ ਕੇਸੀ ਵੇਣੂਗੋਪਾਲ ਇਹਨਾਂ ਨਾਰਾਜ਼ ਆਗੂਆਂ ਨਾਲ ਮੁਲਾਕਾਤ ਕਰ ਸਕਦੇ ਹਨ।
