December 5, 2022
(New Delhi)
ਪੰਜਾਬ ਵਿੱਚ ਗੈਰ-ਕਾਨੂੰਨੀ ਸ਼ਰਾਬ ਦੀ ਮੈਨੂਫੈਕਚਰਿੰਗ ਅਤੇ ਵਿਕਰੀ ਨੂੰ ਲੈ ਕੇ ਸੁਪਰੀਮ ਕੋਰਟ ਨੇ ਪੰਜਾਬ ਸਰਕਾਰ ਨੂੰ ਝਾੜ ਪਾਈ ਹੈ। ਸੁਪਰੀਮ ਕੋਰਟ ਨੇ ਪੰਜਾਬ ਸਰਕਾਰ ਨੂੰ ਕਿਹਾ, “ਤੁਸੀਂ ਤਾਂ ਦੇਸ਼ ਨੂੰ ਖਤਮ ਕਰ ਦਿਓਗੇ। ਜੇਕਰ ਬਾਰਡਰ ਸਟੇਟ ਹੀ ਸੁਰੱਖਿਅਤ ਨਹੀਂ ਹੈ, ਤਾਂ ਕਿਵੇਂ ਚੱਲੇਗਾ?” ਸੁਪਰੀਮ ਕੋਰਟ ਨੇ ਕਿਹਾ ਕਿ ਤੁਹਾਨੂੰ ਇਸ ਬੁਰਾਈ ‘ਤੇ ਰੋਕ ਲਗਾਉਣੀ ਪਵੇਗੀ। ਇਸ ਤਰ੍ਹਾਂ ਨਹੀਂ ਚੱਲੇਗਾ।
ਸੁਪਰੀਮ ਕੋਰਟ ਸੂਬੇ ਵਿੱਚ ਵੱਡੇ ਪੈਮਾਨੇ ‘ਤੇ ਚੱਲ ਰਹੇ ਗੈਰ-ਕਾਨੂੰਨੀ ਸ਼ਰਾਬ ਦੇ ਨਿਰਮਾਣ ਅਤੇ ਵਿਕਰੀ ਦੇ ਸਬੰਧ ਵਿੱਚ ਮਾਮਲੇ ਦੀ ਸੁਣਵਾਈ ਕਰ ਰਿਹਾ ਸੀ, ਜਿਸ ਦੌਰਾਨ ਇਹ ਟਿੱਪਣੀ ਕੀਤੀ ਗਈ।
ਪੰਜਾਬ ਦੇ ਹਰ ਮੁਹੱਲੇ ‘ਚ ਸ਼ਰਾਬ ਦੀ ਭੱਠੀ- SC
ਜਸਟਿਸ ਐੱਮ.ਆਰ. ਸ਼ਾਹ ਨੇ ਕਿਹਾ ਕਿ ਡਰੱਗਜ਼ ਅਤੇ ਸ਼ਰਾਬ ਦੀ ਸਮੱਸਿਆ ਪੰਜਾਬ ਦਾ ਇੱਕ ਗੰਭੀਰ ਮੁੱਦਾ ਹੈ। ਤੁਸੀਂ(ਸਰਕਾਰ) ਸਿਰਫ਼ FIR ਦਰਜ ਕਰ ਰਹੇ ਹੋ ਅਤੇ ਅੱਗੇ ਦੀ ਕਾਰਵਾਈ ਨਹੀਂ ਕਰ ਰਹੇ। ਉਹਨਾਂ ਕਿਹਾ ਕਿ ਅੱਜ ਪੰਜਾਬ ਦੇ ਹਰ ਮੁਹੱਲੇ ‘ਚ ਸ਼ਰਾਬ ਦੀ ਭੱਠੀ ਹੈ। ਇਹ ਬੇਹੱਦ ਖਤਰਨਾਕ ਹੈ।
ਨਸ਼ੇ ਨਾਲ ਨੌਜਵਾਨਾਂ ਨੂੰ ਖਤਮ ਕਰਨਾ ਬੇਹੱਦ ਅਸਾਨ- SC
ਸੁਪਰੀਮ ਕੋਰਟ ਨੇ ਸੂਬਾ ਸਰਕਾਰ ਤੋਂ ਪੁੱਛਿਆ ਕਿ ਫੜੇ ਗਏ ਲੋਕਾਂ ‘ਤੇ ਮੁਕੱਦਮਾ ਕਦੋਂ ਚੱਲੇਗਾ? ਕੋਰਟ ਨੇ ਕਿਹਾ, “ਅਸੀਂ ਜਵਾਬ ਵੇਖਾਂਗੇ ਅਤੇ ਫਿਰ ਆਦੇਸ਼ ਪਾਸ ਕਰਾਂਗੇ। ਜੇਕਰ ਕੋਈ ਦੇਸ਼ ਖਾਸਕਰ ਸਰਹੱਦੀ ਸੂਬਿਆਂ ਨੂੰ ਖਤਮ ਕਰਨਾ ਚਾਹੁੰਦਾ ਹੈ, ਤਾਂ ਇਹ ਬੇਹੱਦ ਮੰਦਭਾਗਾ ਹੈ।” ਕੋਰਟ ਨੇ ਕਿਹਾ ਕਿ ਨਸ਼ੇ ਨਾਲ ਨੌਜਵਾਨਾਂ ਨੂੰ ਖਤਮ ਕਰਨਾ ਬੇਹੱਦ ਅਸਾਨ ਹੈ, ਇਸ ਲਈ ਵੱਧ ਸਾਵਧਾਨੀ ਬਰਤਣੀ ਪਵੇਗੀ।
ਸਰਕਾਰ ਤੋਂ ਵਿਸਥਾਰ ‘ਚ ਮੰਗਿਆ ਹਲਫ਼ਨਾਮਾ
ਸੁਪਰੀਮ ਕੋਰਟ ਨੇ ਪੰਜਾਬ ਸਰਕਾਰ ਨੂੰ ਇਸ ਮਾਮਲੇ ‘ਤੇ ਵਿਸਥਾਰ ‘ਚ ਹਲਫਨਾਮਾ ਦਾਖਲ ਕਰਕੇ ਪੂਰੀ ਸਥਿਤੀ ਦੱਸਣ ਲਈ ਕਿਹਾ। ਮਾਮਲੇ ਵਿੱਚ ਸੁਪਰੀਮ ਕੋਰਟ ਅਗਲੇ ਸੋਮਵਾਰ ਨੂੰ ਮੁੜ ਸੁਣਵਾਈ ਕਰੇਗਾ।
