ਬਿਓਰੋ। ਸਿੰਘੂ ਬਾਰਡਰ ‘ਤੇ ਮਾਰੇ ਗਏ ਲਖਬੀਰ ਸਿੰਘ ਦਾ ਸ਼ਨੀਵਾਰ ਦੇਰ ਰਾਤ ਤਰਨਤਾਰਨ ਵਿੱਚ ਉਸਦੇ ਪਿੰਡ ਚੀਮਾ ਵਿੱਚ ਅੰਤਿਮ ਸਸਕਾਰ ਕਰ ਦਿੱਤਾ ਗਿਆ। ਸੋਨੀਪਤ ਤੋਂ ਜਿਸ ਐਂਬੂਲੈਂਸ ਵਿੱਚ ਲਾਸ਼ ਲਿਆਂਦੀ ਗਈ, ਉਸ ਨੂੰ ਸਿੱਧੇ ਪਿੰਡ ਦੇ ਸ਼ਮਸ਼ਾਨ ਘਾਟ ਲਿਜਾਇਆ ਗਿਆ। ਸ਼ਮਸ਼ਾਨ ਘਾਟ ਵਿੱਚ ਲਖਬੀਰ ਦੀ ਪਤਨੀ ਜਸਪ੍ਰੀਤ ਕੌਰ, ਭੈਣ ਰਾਜ ਕੌਰ ਅਤੇ ਦੂਜੇ ਰਿਸ਼ਤੇਦਾਰ ਪਹਿਲਾਂ ਤੋਂ ਹੀ ਮੌਜੂਦ ਸਨ। ਅੰਤਿਮ ਸਸਕਾਰ ਦੇ ਦੌਰਾਨ ਕੋਈ ਅਰਦਾਸ ਨਹੀਂ ਕੀਤੀ ਗਈ। ਪਾਲੀਥੀਨ ਵਿੱਚ ਬੰਦ ਲਖਬੀਰ ਸਿੰਘ ਦਾ ਚਿਹਰਾ ਵੀ ਉਸਦੇ ਪਰਿਵਾਰਕ ਮੈਂਬਰਾਂ ਨੂੰ ਨਹੀਂ ਵਿਖਾਇਆ ਗਿਆ।
ਲਾਸ਼ ਤੋਂ ਪਾਲੀਥੀਨ ਵੀ ਨਹੀਂ ਹਟਾਇਆ
ਆਮ ਤੌਰ ‘ਤੇ ਪੋਸਟਮਾਰਟਮ ਤੋਂ ਬਾਅਦ ਜਿਸ ਪਾਲੀਥੀਨ ਵਿੱਚ ਲਾਸ਼ ਨੂੰ ਲਪੇਟਿਆ ਜਾਂਦਾ ਹੈ, ਉਸ ਨੂੰ ਚਿਖਾ ਦੇ ਨਾਲ ਸਾੜਿਆ ਨਹੀਂ ਜਾਂਦਾ, ਪਰ ਲਖਬੀਰ ਦੀ ਬਾਡੀ ਤੋਂ ਇਹ ਪਾਲੀਥੀਨ ਵੀ ਨਹੀਂ ਉਤਾਰਿਆ ਗਿਆ। ਚਿਖਾ ਦੀਆਂ ਲੱਕੜਾਂ ਅੱਗ ਜਲਦੀ ਫੜ ਲੈਣ, ਇਸਦੇ ਲਈ ਚਿਖਾ ‘ਤੇ ਘਿਓ ਦੀ ਜਗ੍ਹਾ ਬੋਤਲ ਨਾਲ ਡੀਜ਼ਲ ਪਾਇਆ ਗਿਆ। ਲਾਸ਼ ਦੇ ਸ਼ਮਸ਼ਾਨ ਘਾਟ ਪਹੁੰਚਣ ਦੇ ਮਹਿਜ਼ 10 ਮਿੰਟਾਂ ਦੇ ਅੰਦਰ ਹੀ ਚਿਖਾ ਨੂੰ ਅਗਨ ਭੇਂਟ ਕਰ ਦਿੱਤਾ ਗਿਆ।
ਹਨੇਰੇ ‘ਚ ਹੋਇਆ ਲਖਬੀਰ ਦਾ ਸਸਕਾਰ
ਅੰਤਿਮ ਸਸਕਾਰ ਦੇ ਵਕਤ ਸ਼ਮਸ਼ਾਨ ਘਾਟ ਵਿੱਚ ਉਚਿਤ ਰੋਸ਼ਨੀ ਵੀ ਨਹੀਂ ਸੀ, ਇਸ ਲਈ ਲਖਬੀਰ ਦਾ ਸਸਕਾਰ ਮੋਬਾਈਲ ਦੀ ਰੋਸ਼ਨੀ ਵਿੱਚ ਕੀਤਾ ਗਿਆ। ਲਖਬੀਰ ਸਿੰਘ ਦੇ ਸਸਕਾਰ ਦੇ ਵਕਤ ਤਰਨਤਾਰਨ ਦੇ DSP ਸੁੱਚਾ ਸਿੰਘ ਦੀ ਅਗਵਾਈ ਵਿੱਚ ਭਾਰੀ ਪੁਲਿਸ ਬਲ ਤੈਨਾਤ ਰਿਹਾ। ਸਸਕਾਰ ਵਿੱਚ ਚੀਮਾ ਪਿੰਡ ਦਾ ਕੋਈ ਵੀ ਸ਼ਖਸ ਸ਼ਾਮਲ ਨਹੀਂ ਹੋਇਆ।
ਸਸਕਾਰ ਕਰਨ ‘ਤੇ ਵਿਵਾਦ ਵੀ ਹੋਇਆ
ਇਸ ਤੋਂ ਪਹਿਲਾਂ, ਸ਼ਨੀਵਾਰ ਸਵੇਰੇ ਚੀਮਾ ਪਿੰਡ ਦੇ ਪੰਚਾਇਤ ਮੈਂਬਰਾਂ ਅਤੇ ਲੋਕਾਂ ਨੇ ਸਪੱਸ਼ਟ ਕਰ ਦਿੱਤਾ ਸੀ ਕਿ ਲਖਬੀਰ ‘ਤੇ ਗੁਰੂ ਗ੍ਰੰਥ ਸਾਹਿਬ ਜੀ ਦੀ ਬੇਅਦਬੀ ਦਾ ਇਲਜਾਮ ਹੈ, ਇਸ ਲਈ ਉਹ ਉਸਦਾ ਸਸਕਾਰ ਆਪਣੇ ਪਿੰਡ ਵਿੱਚ ਨਹੀਂ ਹੋਣ ਦੇਣਗੇ। ਦੁਪਹਿਰ ਬਾਅਦ ਸਤਿਕਾਰ ਕਮੇਟੀ ਦੇ ਮੈਂਬਰ ਵੀ ਪਿੰਡ ਪਹੁੰਚ ਗਏ ਅਤੇ ਕਹਿ ਦਿੱਤਾ ਕਿ ਉਹ ਸਸਕਾਰ ਸਿੱਖ ਮਰਿਆਦਾ ਤਹਿਤ ਨਹੀਂ ਹੋਣ ਦੇਣਗੇ। ਹਾਲਾਂਕਿ ਬਾਅਦ ਵਿੱਚ ਇਹ ਲੋਕ ਪਿੰਡ ਵਿੱਚ ਲਖਬੀਰ ਦਾ ਸਸਕਾਰ ਕੀਤੇ ਜਾਣ ‘ਤੇ ਰਾਜੀ ਹੋ ਗਏ। ਨਾਲ ਹੀ ਇਹ ਵੀ ਸਾਫ਼ ਕੀਤਾ ਕਿ ਪਿੰਡ ਦਾ ਕੋਈ ਵੀ ਸ਼ਖਸ ਅੰਤਿਮ ਸਸਕਾਰ ਵਿੱਚ ਨਹੀਂ ਜਾਵੇਗਾ।
