ਹਾਈਕਮਾਂਡ ਦੀਆਂ ਤਮਾਮ ਕੋਸ਼ਿਸ਼ਾਂ ਦੇ ਬਾਵਜੂਦ ਪੰਜਾਬ ਕਾਂਗਰਸ ਦਾ ਘਮਸਾਣ ਖਤਮ ਹੁੰਦਾ ਨਜ਼ਰ ਨਹੀਂ ਆ ਰਿਹਾ। ਉਲਟਾ ਨਵਜੋਤ ਸਿੰਘ ਸਿੱਧੂ ਦੇ ਪੰਜਾਬ ਕਾਂਗਰਸ ਪ੍ਰਧਾਨ ਬਣਨ ਤੋਂ ਬਾਅਦ ਪਾਰਟੀ ‘ਚ ਧੜੇਬੰਦੀ ਹੋਰ ਤੇਜ਼ ਹੋਈ ਹੈ। ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਦੀ ਕਾਂਗਰਸ ਪ੍ਰਧਾਨ ਸੋਨੀਆ ਗਾਂਧੀ ਨਾਲ ਹੋ ਰਹੀ ਮੁਲਾਕਾਤ ਵਿਚਾਲੇ ਕੈਪਟਨ ਵਿਰੋਧੀ ਕੈਪਟਨ ਵਿਰੋਧੀ ਧੜਾ ਵੀ ਸਰਗਰਮ ਹੋ ਗਿਆ ਹੈ।
ਸੋਨੀਆ ਨੂੰ ਕੈਪਟਨ ਦੀ ਸ਼ਿਕਾਇਤ
ਸੋਨੀਆ ਅਤੇ ਕੈਪਟਨ ਦੀ ਬੈਠਕ ਤੋਂ ਪਹਿਲਾਂ 5 ਮੰਤਰੀਆਂ ਅਤੇ ਕਰੀਬ 7 ਵਿਧਾਇਕਾਂ ਨੇ ਸੋਨੀਆ ਗਾਂਧੀ ਨੂੰ ਚਿੱਠੀ ਲਿਖੀ ਹੈ। ਸੂਤਰਾਂ ਮੁਤਾਬਕ, ਇਸ ਚਿੱਠੀ ‘ਚ ਕੈਪਟਨ ਦੇ ਕੰਮਕਾਜ ‘ਤੇ ਸਵਾਲ ਚੁੱਕੇ ਗਏ ਹਨ ਅਤੇ ਕਿਹਾ ਗਿਆ ਹੈ ਕਿ ਹਾਈਕਮਾਂਡ ਦੀ ਹਦਾਇਤ ਦੇ ਬਾਵਜੂਦ ਸੀਐੱਮ ਕੈਪਟਨ ਅਮਰਿੰਦਰ ਸਿੰਘ 18 ਨੁਕਾਤੀ ਏਜੰਡੇ ਨੂੰ ਲੈ ਕੇ ਗੰਭੀਰ ਨਹੀਂ ਹਨ। ਉਹਨਾਂ ਨੇ ਚਿੱਠੀ ਜ਼ਰੀਏ ਸੋਨੀਆ ਗਾਂਧੀ ਤੋਂ ਮਿਲਣ ਦਾ ਸਮਾਂ ਵੀ ਮੰਗਿਆ ਹੈ।
ਇਹਨਾਂ ਮੰਤਰੀਆਂ ਨੇ ਲਿਖੀ ਚਿੱਠੀ
ਸੋਨੀਆ ਗਾਂਧੀ ਨੂੰ ਲਿਖੇ ਇਸ ਪੱਤਰ ‘ਚ ਪੰਜਾਬ ਦੇ 5 ਕੈਬਨਿਟ ਮੰਤਰੀ ਤ੍ਰਿਪਤ ਰਜਿੰਦਰ ਸਿੰਘ ਬਾਜਵਾ, ਸੁਖਬਿੰਦਰ ਸਿੰਘ ਸੁਖ ਸਰਕਾਰੀਆ, ਸੁਖਜਿੰਦਰ ਸਿੰਘ ਰੰਧਾਵਾ, ਚਰਨਜੀਤ ਸਿੰਘ ਚੰਨੀ ਅਤੇ ਰਜੀਆ ਸੁਲਤਾਨਾ ਦੇ ਦਸਤਖਤ ਹਨ। ਦੱਸ ਦਈਏ ਕਿ ਇਹ ਸਾਰੇ ਮੰਤਰੀ ਸ਼ੁਰੂ ਤੋਂ ਹੀ ਸੀਐੱਮ ਕੈਪਟਨ ਦੀ ਮੁਖਾਲਫਤ ਕਰਦੇ ਰਹੇ ਹਨ।
ਕਾਊਂਟਰ ਅਟੈਕ ਦੀ ਤਿਆਰੀ
ਕਾਂਗਰਸ ਸੂਤਰਾਂ ਦੇ ਮੁਤਾਬਕ, ਇਹ ਪੱਤਰ ਇਸ ਲਈ ਲਿਖਿਆ ਗਿਆ ਹੈ, ਤਾਂ ਜੋ ਸੀਐੱਮ ਕੈਪਟਨ ਅਮਰਿੰਦਰ ਸਿੰਘ ਜੇਕਰ ਸੋਨੀਆ ਗਾਂਧੀ ਨਾਲ ਮੁਲਾਕਾਤ ਦੌਰਾਨ ਇਹਨਾਂ ਮੰਤਰੀਆਂ ‘ਚੋਂ ਕਿਸੇ ਨੂੰ ਵੀ ਮੰਤਰੀਮੰਡਲ ‘ਚੋਂ ਬਾਹਰ ਕਰਨ ਨੂੰ ਲੈ ਕੇ ਚਰਚਾ ਕਰਨ, ਤਾਂ ਇਹ ਪੱਤਰ ਕਾਊਂਟਰ ਅਟੈਕ ਵਜੋਂ ਕੰਮ ਆ ਸਕੇ।
