ਲੁਧਿਆਣਾ: ਪੰਜਾਬ ‘ਚ ਸਕੂਲ ਖੁੱਲ੍ਹਦੇ ਹੀ ਕੋਰੋਨਾ ਦੇ ਮਾਮਲੇ ਲਗਾਤਾਰ ਵਧਣ ਲੱਗੇ ਹਨ। ਲੁਧਿਆਣਾ ਦੇ 2 ਸਰਕਾਰੀ ਸਕੂਲਾਂ ‘ਚ ਕਰੀਬ 20 ਵਿਦਿਆਰਥੀ ਕੋਰੋਨਾ ਪਾਜੀਟਿਵ ਪਾਏ ਜਾਣ ਦੇ ਚਲਦੇ ਸਿਹਤ ਵਿਭਾਗ ਅਤੇ ਜਿਲ੍ਹਾ ਪ੍ਰਸ਼ਾਸਨ ‘ਚ ਹੜਕੰਪ ਮਚ ਗਿਆ। ਸਰਕਾਰੀ ਸੀਨੀਅਰ ਸੈਕੰਡਰੀ ਸਕੂਲ ਬਸਤੀ ਜੋਧੇਵਾਲ, ਨਿਊ ਸੁਭਾਸ਼ ਨਗਰ ‘ਚ 41 ਵਿਦਿਆਰਥੀਆਂ ਦੇ ਰੈਪਿਡ ਟੈਸਟ ਕੀਤੇ ਗਏ, ਜਿਸ ‘ਚ ਇੱਕ ਹੀ ਕਲਾਸ ਦੇ 8 ਵਿਦਿਆਰਥੀ ਰੈਪਿਡ ਟੈਸਟ ‘ਚ ਪਾਜੀਟਿਵ ਨਿਕਲੇ। ਨਾਲ ਹੀ ਸਰਕਾਰ ਹਾਈ ਸਕੂਲ, ਕੈਲਾਸ਼ ਨਗਰ ਦੇ 12 ਵਿਦਿਆਰਥੀ ਪਾਜੀਟਿਵ ਪਾਏ ਗਏ।
ਵਿਦਿਆਰਥੀਆਂ ਨੂੰ ਕੁਆਰੰਟੀਨ ਕੀਤਾ ਗਿਆ
ਫਿਲਹਾਲ ਸਾਰੇ ਵਿਦਿਆਰਥੀਆਂ ਨੂੰ ਕੁਆਰੰਟੀਨ ਕਰ ਦਿੱਤਾ ਗਿਆ ਹੈ ਅਤੇ RT-PCR ਟੈਸਟ ਦੀ ਰਿਪੋਰਟ ਦਾ ਇੰਤਜਾਰ ਹੈ। ਜਾਣਕਾਰੀ ਮੁਤਾਬਕ, ਰੈਪਿਡ ਟੈਸਟ ‘ਚ ਪਾਜੀਟਿਵ ਆਉਣ ਵਾਲੇ ਵਿਦਿਆਰਥੀਆਂ ‘ਚ ਕਿਸੇ ਤਰ੍ਹਾਂ ਦੇ ਲੱਛਣ ਨਹੀਂ ਸਨ। ਬਹਿਰਹਾਲ, 14 ਦਿਨਾਂ ਲਈ ਦੋਵੇਂ ਸਕੂਲਾਂ ਨੂੰ ਬੰਦ ਕਰ ਦਿੱਤਾ ਗਿਆ ਹੈ।
2 ਅਗਸਤ ਤੋਂ ਖੋਲ੍ਹੇ ਗਏ ਹਨ ਸਾਰੇ ਸਕੂਲ
ਦਰਅਸਲ, ਸਰਕਾਰ ਵੱਲੋਂ 26 ਜੁਲਾਈ ਤੋਂ 10ਵੀਂ ਤੋਂ 12ਵੀਂ ਅਤੇ 2 ਅਗਸਤ ਤੋਂ ਸਾਰੇ ਸਕੂਲਾਂ ਨੂੰ ਖੋਲ੍ਹਿਆ ਗਿਆ ਸੀ। ਇਸ ਤੋਂ ਬਾਅਦ ਮੁੱਖ ਸਕੱਤਰ ਵੱਲੋਂ ਸਕੂਲਾਂ ‘ਚ ਰੈਪਿਡ ਟੈਸਟਿੰਗ ਕੀਤੇ ਜਾਣ ਦੇ ਆਦੇਸ਼ ਦਿੱਤੇ ਗਏ ਅਤੇ ਰੈਪਿਡ ਟੈਸਟਿੰਗ ਸ਼ੁਰੂ ਹੁੰਦੇ ਹੀ ਜੋ ਨਤੀਜੇ ਸਾਹਮਣੇ ਆਏ ਹਨ, ਉਹ ਚਿੰਤਾ ਵਧਾਉਣ ਵਾਲੇ ਹਨ।
ਕੋਰੋਨਾ ਦਾ ਹੌਟਸਪੌਟ ਰਿਹਾ ਲੁਧਿਆਣਾ
ਜਿਕਰਯੋਗ ਹੈ ਕਿ ਕੋਰੋਨਾ ਦੀ ਪਹਿਲੀ ਅਤੇ ਦੂਜੀ ਲਹਿਰ ‘ਚ ਪੰਜਾਬ ‘ਚ ਲੁਧਿਆਣਾ ਸਭ ਤੋਂ ਵੱਧ ਪ੍ਰਭਾਵਿਤ ਰਿਹਾ। ਪਾਜੀਟਿਵ ਕੇਸਾਂ ਅਤੇ ਮੌਤ ਦਰ ਦੋਵਾਂ ‘ਚ ਲੁਧਿਆਣਾ ਦੇ ਅੰਕੜੇ ਹਮੇਸ਼ਾ ਚਿੰਤਾ ਵਧਾਉਣ ਵਾਲੇ ਰਹੇ। ਫਿਲਹਾਲ ਕੁਝ ਸਮੇਂ ਤੋਂ ਹਾਲਾਤ ਠੀਕ ਸਨ, ਪਰ ਸਕੂਲਾਂ ਦੇ ਖੁੱਲ੍ਹਦੇ ਹੀ ਚਿੰਤਤ ਹੋਣਾ ਲਾਜ਼ਮੀ ਹੈ।
