October 12, 2022
(New Delhi)
ਦਿੱਲੀ ਪੁਲਿਸ ਦੀ ਸਪੈਸ਼ਲ ਸੈੱਲ ਨੇ ਮੁਠਭੇੜ ਤੋਂ ਬਾਅਦ ਲਾਰੈਂਸ ਬਿਸ਼ਨੋਈ-ਸੰਪਤ ਨਹਿਰਾ-ਟੀਨੂੰ ਗੈਂਗ ਦੇ 2 ਗੈਂਗਸਟਰਾਂ ਨੂੰ ਗ੍ਰਿਫ਼ਤਾਰ ਕੀਤਾ ਹੈ। ਫੜੇ ਗਏ ਬਦਮਾਸ਼ਾਂ ਦੀ ਪਛਾਣ ਦੀਪਕ ਅਰੋੜਾ ਉਰਫ ਦੀਪਾ ਉਰਫ ਪੋਪਟ ਅਤੇ ਗੁਲਸ਼ਨ ਕੁਮਾਰ ਉਰਫ ਗੁਲੀਆ ਦੇ ਰੂਪ ਵਿੱਚ ਹੋਈ ਹੈ, ਜਿਹਨਾਂ ਨੂੰ ਦਿੱਲੀ ਦੇ ਲਾਡੋ ਸਰਾਏ ਇਲਾਕੇ ਤੋਂ ਗ੍ਰਿਫ਼ਤਾਰ ਕੀਤਾ ਗਿਆ ਹੈ।
ਦੋਵੇਂ ਗੈਂਗਸਟਰਾਂ ਕੋਲੋਂ 6 ਕਾਰਤੂਸਾਂ ਸਣੇ 2 ਪਿਸਤੌਲਾਂ ਬਰਾਮਦ ਹੋਈਆਂ ਹਨ। ਇਹਨਾਂ ਦੋਵਾਂ ‘ਤੇ ਦਿੱਲੀ ਅਤੇ ਹਰਿਆਣਾ ਵਿੱਚ ਇੱਕ ਦਰਜਨ ਤੋਂ ਵੱਧ ਅਪਰਾਧਿਕ ਮਾਮਲੇ ਦਰਜ ਹਨ।
ਇਸ ਤਰ੍ਹਾਂ ਫੜੇ ਗਏ ਦੋਵੇਂ ਬਦਮਾਸ਼
ਸਪੈਸ਼ਲ ਸੈੱਲ ਦੇ DCP ਜਸਮੀਤ ਸਿੰਘ ਮੁਤਾਬਕ, ਟੀਮ ਨੂੰ ਦੋਵੇਂ ਗੈਂਗਸਟਰਾਂ ਦੇ ਦਿੱਲੀ ਵਿੱਚ ਆਉਣ ਦੀ ਸੂਚਨਾ ਮਿਲੀ, ਜਿਸ ਤੋਂ ਬਾਅਦ ਦੀਪਕ ਉਰਫ ਪੋਪਟ ਅਤੇ ਗੁਲਸ਼ਨ ਕੁਮਾਰ ਛਤਰਪੁਰ ਤੋਂ ਲਾਡੋ ਸਰਾਏ ਵੱਲ ਜਾਂਦੇ ਨਜ਼ਰ ਆਏ। ਪੁਲਿਸ ਨੇ ਚੈਕਿੰਗ ਪੁਆਇੰਟ ‘ਤੇ ਇਹਨਾਂ ਨੂੰ ਰੁਕਣ ਦਾ ਇਸ਼ਾਰਾ ਕੀਤਾ, ਪਰ ਦੀਪਕ ਉਰਫ ਪੋਪਟ ਨੇ ਅਚਾਨਕ ਪਿਸਤੌਲ ਕੱਢ ਕੇ ਪੁਲਿਸ ਟੀਮ ‘ਤੇ ਗੋਲੀਆਂ ਚਲਾ ਦਿੱਤੀਆਂ। ਟੀਮ ਦੇ ਮੈਂਬਰਾਂ ਨੇ ਵੀ ਮੁਲਜ਼ਮਾਂ ‘ਤੇ ਕਾਬੂ ਪਾਉਣ ਲਈ ਗੋਲੀਆਂ ਚਲਾਈਆਂ। ਆਖਰਕਾਰ ਪੁਲਿਸ ਟੀਮ ਦੇ ਮੈਂਬਰਾਂ ਨੇ ਦੋਵੇਂ ਬਦਮਾਸ਼ਾਂ ਨੂੰ ਕਾਬੂ ਕਰ ਲਿਆ।
ਲਾਰੈਂਸ, ਨਹਿਰਾ ਅਤੇ ਟੀਨੂੰ ਦੇ ਕਰੀਬੀ
ਦੋਵੇਂ ਗ੍ਰਿਫ਼ਤਾਰ ਮੁਲਜ਼ਮ ਨਾਮੀ ਗੈਂਗਸਟਰ ਲਾਰੈਂਸ ਬਿਸ਼ਨੋਈ, ਸੰਪਤ ਨਹਿਰਾ, ਦੀਪਕ ਉਰਫ ਟੀਨੂੰ ਭਿਵਾਨੀ, ਮਨੋਜ ਬੱਕਰਵਾਲਾ ਅਤੇ ਰਾਜੂ ਬਸੌਦੀ ਦੇ ਕਰੀਬੀ ਦੱਸੇ ਜਾ ਰਹੇ ਹਨ। ਦੋਵੇਂ ਮੁਲਜ਼ਮ ਦਿੱਲੀ ਅਤੇ ਹਰਿਆਣਾ ਵਿੱਚ ਕਈ ਅਪਰਾਧਿਕ ਮਾਮਲਿਆਂ ਵਿੱਚ ਸ਼ਾਮਲ ਹਨ। ਦੀਪਕ ਉਰਫ ਪੋਪਟ ਮੌਜੂਦਾ ਸਮੇਂ ਵਿੱਚ 6 ਅਪਰਾਧਿਕ ਮਾਮਲਿਆਂ ਯਾਨੀ ਹਰਿਆਣਾ ‘ਚ 4 ਅਤੇ ਦਿੱਲੀ ‘ਚ 2 ਮਾਮਲਿਆਂ ਵਿੱਚ ਲੋੜੀਂਦਾ ਸੀ ਅਤੇ ਫਰਾਰ ਚੱਲ ਰਿਹਾ ਸੀ।
2 ਪਿਸਤੌਲਾਂ ਅਤੇ ਚੋਰੀ ਦੀ ਬਾਈਕ ਬਰਾਮਦ
ਦੀਪਕ ਕੋਲੋਂ .32 ਬੋਰ ਦੀ ਇੱਕ ਸੈਮੀ-ਆਟੋਮੈਟਿਕ ਪਿਸਟਲ, ਚਾਰ ਕਾਰਤੂਸ ਅਤੇ ਗੁਲਸ਼ਨ ਕੁਮਾਰ ਕੋਲੋਂ .315 ਬੋਰ ਦੀ ਇੱਕ ਸਿੰਗਲ ਸ਼ੌਟ ਪਿਸਟਲ ਅਤੇ 2 ਕਾਰਤੂਸ ਬਰਾਮਦ ਕੀਤੇ ਗਏ ਹਨ। ਦੋਵਾਂ ਦੇ ਕਬਜ਼ੇ ‘ਚੋਂ ਇੱਕ TVS ਬਾਈਕ ਵੀ ਬਰਾਮਦ ਹੋਈ ਹੈ, ਜਿਸਦੇ ਬਾਰੇ ਉਹਨਾਂ ਨੇ ਖੁਲਾਸਾ ਕੀਤਾ ਕਿ ਉਹਨਾਂ ਨੇ ਕਰੀਬ 2 ਮਹੀਨੇ ਪਹਿਲਾਂ ਇਸ ਨੂੰ ਦਿੱਲੀ ਦੇ ਯਮੁਨਾ ਵਿਹਾਰ ਇਲਾਕੇ ਤੋਂ ਚੋਰੀ ਕੀਤਾ ਸੀ।
