ਚੰਡੀਗੜ੍ਹ। ਪੰਜਾਬ ਦੀਆਂ ਵਿਧਾਨ ਸਭਾ ਚੋਣਾਂ ਤੋਂ ਪਹਿਲਾਂ ਸ਼੍ਰੋਮਣੀ ਅਕਾਲੀ ਦਲ ਨੂੰ ਉਸ ਵੇਲੇ ਵੱਡੀ ਮਜ਼ਬੂਤੀ ਮਿਲੀ, ਜਦੋਂ ਪ੍ਰਕਾਸ਼ ਬਾਦਲ ਦੇ ਕਰੀਬੀ ਰਹੇ ਟਕਸਾਲੀ ਅਕਾਲੀ ਰਣਜੀਤ ਸਿੰਘ ਬ੍ਰਹਮਪੁਰਾ ਨੇ ਘਰ ਵਾਪਸੀ ਕਰ ਲਈ। ਚੰਡੀਗੜ੍ਹ ਵਿੱਚ ਸਾਬਕਾ ਸੀਐੱਮ ਪ੍ਰਕਾਸ਼ ਸਿੰਘ ਬਾਦਲ ਅਤੇ ਅਕਾਲੀ ਦਲ ਪ੍ਰਧਾਨ ਸੁਖਬੀਰ ਬਾਦਲ ਨੇ ਉਨ੍ਹਾਂ ਨੂੰ ਮੁੜ ਪਾਰਟੀ ਵਿੱਚ ਜੀ ਆਇਆਂ ਕਿਹਾ। ਸੁਖਬੀਰ ਬਾਦਲ ਨੇ ਆਪਣੇ ਪਿਤਾ ਸਮਾਨ ਬ੍ਰਹਮਪੁਰਾ ਦੇ ਪੈਰੀਂ ਹੱਥ ਲਾ ਕੇ ਅਸ਼ੀਰਵਾਦ ਵੀ ਲਿਆ।
ਘਰ ਵਾਪਸੀ ਤੋਂ ਬਾਅਦ ਰਣਜੀਤ ਸਿੰਘ ਬ੍ਰਹਮਪੁਰਾ ਅਤੇ ਸਾਬਕਾ ਸੀਐੱਮ ਪ੍ਰਕਾਸ਼ ਸਿੰਘ ਬਾਦਲ ਇੱਕ-ਦੂਜੇ ਦਾ ਮੂੰਹ ਮਿੱਠਾ ਕਰਵਾਉਂਦੇ ਵੀ ਨਜ਼ਰ ਆਏ। ਇਸ ਵੀਡੀਓ ਨੂੰ ਟਵੀਟ ਕਰਦੇ ਹੋਏ ਸੁਖਬੀਰ ਨੇ ਲਿਖਿਆ, “ਮੈਂ ਬੇਹੱਦ ਖੁਸ਼ ਹਾਂ ਕਿ ਮੇਰੇ ਪਿਤਾ ਪ੍ਰਕਾਸ਼ ਸਿੰਘ ਜੀ ਬਾਦਲ ਦੀਆਂ ਵੱਡੀਆਂ ਇੱਛਾਵਾਂ ‘ਚੋਂ ਇੱਕ ਅੱਜ ਪੂਰੀ ਹੋ ਗਈ।”
I feel so happy that one of the greatest wishes of my father S Parkash Singh Ji Badal has been fulfilled today with the return of Brahampura Sahib to the Akali family.@Akali_Dal_ pic.twitter.com/P4u4jO8cch
— Sukhbir Singh Badal (@officeofssbadal) December 23, 2021
ਬ੍ਰਹਮਪੁਰਾ ਨੇ ਯਾਦ ਕੀਤੇ ਪੁਰਾਣੇ ਦਿਨ
ਇਸ ਦੌਰਾਨ ਬ੍ਰਹਮਪੁਰਾ ਨੇ ਪ੍ਰਕਾਸ਼ ਸਿੰਘ ਬਾਦਲ ਨੇ ਆਪਣੇ ਪੁਰਾਣੇ ਦਿਨਾਂ ਨੂੰ ਯਾਦ ਕੀਤਾ। ਇਸ ਦੇ ਨਾਲ ਹੀ ਉਨ੍ਹਾਂ ਕਿਹਾ ਕਿ ਉਨ੍ਹਾਂ ਨੂੰ ਪਾਰਟੀ ਵਿੱਚ ਕੋਈ ਅਹੁਦਾ ਨਹੀਂ ਚਾਹੀਦਾ। ਬੱਸ ਇਹ ਖੁਸ਼ੀ ਹੈ ਕਿ ਬਾਦਲ ਤੋਂ ਬਾਅਦ ਪਾਰਟੀ ਵਿੱਚ ਉਹਨਾਂ ਦੀ ਹੈਸੀਅਤ ਨੰਬਰ-2 ਦੀ ਹੈ।
ਸੁਖਬੀਰ ਦਾ ਵੱਧਦਾ ਕੱਦ ਵੇਖ ਕੇ ਛੱਡੀ ਸੀ ਪਾਰਟੀ
ਪੰਜਾਬ ਵਿੱਚ ਜਦੋਂ ਤੱਕ ਪ੍ਰਕਾਸ਼ ਸਿੰਘ ਬਾਦਲ ਖੁਦ ਅਕਾਲੀ ਦਲ ਨੂੰ ਚਲਾਉਂਦੇ ਰਹੇ, ਉਦੋਂ ਤੱਕ ਤਮਾਮ ਟਕਸਾਲੀ ਆਗੂ ਉਨ੍ਹਾਂ ਦੇ ਨਾਲ ਚਲਦੇ ਰਹੇ। ਪਰ ਜਿਵੇਂ ਹੀ ਪਾਰਟੀ ਵਿੱਚ ਸੁਖਬੀਰ ਦਾ ਕੱਦ ਵਧਣ ਲੱਗਿਆ, ਟਕਸਾਲੀ ਆਗੂ ਨਰਾਜ਼ ਹੋਣ ਲੱਗੇ। ਸੁਖਬੀਰ ਸਿੰਘ ਬਾਦਲ ਦਾ ਵਧਦਾ ਕੱਦ ਵੇਖ ਕੇ ਹੀ ਬ੍ਰਹਮਪੁਰਾ ਨੇ ਅਕਾਲੀ ਦਲ ਨੂੰ ਅਲਵਿਦਾ ਆਖਿਆ ਸੀ ਅਤੇ ਕਈ ਤਰ੍ਹਾਂ ਦੇ ਸਵਾਲ ਵੀ ਖੜ੍ਹੇ ਕੀਤੇ ਸਨ। ਇਸ ਤੋਂ ਬਾਅਦ ਉਨ੍ਹਾਂ ਨੇ ਟਕਸਾਲੀ ਅਕਾਲੀ ਰਹੇ ਸੇਵਾ ਸਿੰਘ ਸੇਖਵਾਂ ਅਤੇ ਰਤਨ ਸਿੰਘ ਅਜਨਾਲਾ ਨਾਲ ਮਿਲ ਕੇ ਸ਼੍ਰੋਮਣੀ ਅਕਾਲੀ ਦਲ ਟਕਸਾਲੀ ਦਾ ਗਠਨ ਕੀਤਾ ਸੀ। ਹਾਲਾਂਕਿ ਇਸ ਤੋਂ ਬਾਅਦ ਜਲਦ ਹੀ ਉਨ੍ਹਾਂ ਨੇ ਸਾਬਕਾ ਰਾਜ ਸਭਾ ਮੈਂਬਰ ਸੁਖਦੇਵ ਢੀਂਡਸਾ ਨਾਲ ਮਿਲ ਕੇ ਸ਼੍ਰੋਮਣੀ ਅਕਾਲੀ ਦਲ (ਸੰਯੁਕਤ) ਪਾਰਟੀ ਬਣਾ ਲਈ।
ਕੈਪਟਨ ਤੇ ਬੀਜੇਪੀ ਨਾਲ ਗਠਜੋੜ ਤੋਂ ਸਨ ਨਰਾਜ਼
ਕੈਪਟਨ ਅਮਰਿੰਦਰ ਸਿੰਘ ਵੱਲੋਂ ਕਾਂਗਰਸ ਤੋਂ ਅਸਤੀਫ਼ਾ ਦੇਣ ਮਗਰੋਂ ਜਿਵੇਂ ਹੀ ਨਵੀਂ ਪਾਰਟੀ ਦੇ ਗਠਨ ਦਾ ਐਲਾਨ ਕੀਤਾ ਗਿਆ, ਤਾਂ ਉਨ੍ਹਾਂ ਨੇ ਨਾਲ ਹੀ ਇਹ ਵੀ ਕਿਹਾ ਕਿ ਉਹ ਬੀਜੇਪੀ ਅਤੇ ਸ਼੍ਰੋਮਣੀ ਅਕਾਲੀ ਦਲ (ਸੰਯੁਕਤ) ਨਾਲ ਮਿਲ ਕੇ ਚੋਣ ਲੜਨਗੇ। ਇਸ ਲਈ ਕੈਪਟਨ ਅਤੇ ਬੀਜੇਪੀ ਲਗਾਤਾਰ ਢੀਂਡਸਾ ਦੇ ਸੰਪਰਕ ਵਿੱਚ ਸਨ। ਬ੍ਰਹਮਪੁਰਾ ਇਸੇ ਗਠਜੋੜ ਤੋਂ ਨਰਾਜ਼ ਚੱਲ ਰਹੇ ਸਨ। ਬ੍ਰਹਮਪੁਰਾ ਦਾ ਮੰਨਣਾ ਸੀ ਕਿ ਬੇਸ਼ੱਕ ਕਿਸਾਨ ਅੰਦੋਲਨ ਖਤਮ ਹੋ ਚੁੱਕਿਆ ਹੈ, ਪਰ ਬੀਜੇਪੀ ਖ਼ਿਲਾਫ਼ ਰੋਹ ਅਜੇ ਵੀ ਬਰਕਰਾਰ ਹੈ, ਲਿਹਾਜ਼ਾ ਬੀਜੇਪੀ ਨਾਲ ਗਠਜੋੜ ਨਹੀਂ ਹੋਣਾ ਚਾਹੀਦਾ। ਇਸਦੇ ਬਾਵਜੂਦ ਢੀਂਡਸਾ ਨੇ ਹਾਲ ਹੀ ਵਿੱਚ ਕੇਂਦਰੀ ਗ੍ਰਹਿ ਮੰਤਰੀ ਅਮਿਤ ਸ਼ਾਹ ਨਾਲ ਮੁਲਾਕਾਤ ਕੀਤੀ, ਜਿਸ ਤੋਂ ਨਾਰਾਜ਼ ਬ੍ਰਹਮਪੁਰਾ ਨੇ ਆਪਣੀ ਮਾਂ ਪਾਰਟੀ ਵਿੱਚ ਵਾਪਸੀ ਦਾ ਮਨ ਬਣਾਇਆ।
ਬ੍ਰਹਮਪੁਰਾ ਦੀ ‘ਘਰ’ ਵਾਪਸੀ ਕੈਪਟਨ ਲਈ ਵੀ ਝਟਕਾ
ਜ਼ਾਹਿਰ ਹੈ ਰਣਜੀਤ ਸਿੰਘ ਬ੍ਰਹਮਪੁਰਾ ਦੀ ਘਰ ਵਾਪਸੀ ਸਾਬਕਾ ਸੀਐੱਮ ਕੈਪਟਨ ਅਮਰਿੰਦਰ ਸਿੰਘ ਲਈ ਵੀ ਵੱਡਾ ਝਟਕਾ ਹੈ, ਕਿਉਂਕਿ ਕੈਪਟਨ ਅਕਾਲੀ ਦਲ ਤੋਂ ਵੱਖ ਹੋਏ ਸੀਨੀਅਰ ਟਕਸਾਲੀ ਆਗੂਆਂ ਦੇ ਨਾਲ ਗਠਜੋੜ ਚਾਹੁੰਦੇ ਸਨ। ਇਨ੍ਹਾਂ ‘ਚੋਂ ਬ੍ਰਹਮਪੁਰਾ ਤਾਂ ਅਕਾਲੀ ਦਲ ਵਿੱਚ ਵਾਪਸ ਚਲੇ ਗਏ। ਲਿਹਾਜ਼ਾ ਹੁਣ ਕੈਪਟਨ ਦੇ ਖਾਤੇ ਸਿਰਫ਼ ਬ੍ਰਹਮਪੁਰਾ ਹੀ ਬਚੇ ਹਨ।
