ਨਵੀਂ ਦਿੱਲੀ। ਟੀਵੀ ਦੇ ਮਸ਼ਹੂਰ ਪੱਤਰਕਾਰ ਵਿਨੋਦ ਦੁਆ ਦਾ ਲੰਮੀ ਬਿਮਾਰੀ ਤੋਂ ਬਾਅਦ ਸ਼ਨੀਵਾਰ ਨੂੰ ਦੇਹਾਂਤ ਹੋ ਗਿਆ। ਉਹ 67 ਸਾਲਾਂ ਦੇ ਸਨ। ਦੁਆ ਨੂੰ ਪਿਛਲੇ ਸਾਲ ਕੋਰੋਨਾ ਮਹਾਂਮਾਰੀ ਨੇ ਆਪਣੀ ਚਪੇਟ ਵਿੱਚ ਲੈ ਲਿਆ ਸੀ, ਜਿਸ ਤੋਂ ਬਾਅਦ ਠੀਕ ਹੋਣ ਮਗਰੋਂ ਵੀ ਉਹਨਾਂ ਦੀ ਹਾਲਤ ਲਗਾਤਾਰ ਖਰਾਬ ਰਹਿੰਦੀ ਰਹੀ। ਪੋਸਟ ਕੋਵਿਡ ਬਿਮਾਰੀਆਂ ਦੇ ਚਲਦੇ ਉਹ ਕਰੀਬ ਇੱਕ ਸਾਲ ਤੋਂ ਵਾਰ-ਵਾਰ ਹਸਪਤਾਲ ਭਰਤੀ ਹੋ ਰਹੇ ਸਨ। ਪਿਛਲੇ ਕਈ ਦਿਨਾਂ ਤੋਂ ਉਹ ICU ਵਿੱਚ ਜਿੰਦਗੀ ਅਤੇ ਮੌਤ ਵਿਚਕਾਰ ਜੰਗ ਲੜ ਰਹੇ ਸਨ।
ਆਪਣੇ ਪਿਤਾ ਦੇ ਦੇਹਾਂਤ ਦੀ ਜਾਣਕਾਰੀ ਸਾਂਝੀ ਕਰਦਿਆਂ ਵਿਨੋਦ ਦੁਆ ਦੀ ਬੇਟੀ ਮੱਲਿਕਾ ਨੇ ਸੋਸ਼ਲ ਮੀਡੀਆ ‘ਤੇ ਲਿਖਿਆ, “ਸਾਡੇ ਨਿਡਰ ਅਤੇ ਅਸਾਧਾਰਨ ਪਿਤਾ, ਵਿਨੋਦ ਦੁਆ ਦਾ ਦੇਹਾਂਤ ਹੋ ਗਿਆ ਹੈ। ਦਿੱਲੀ ਦੀਆਂ ਸ਼ਰਨਾਰਥੀ ਬਸਤੀਆਂ ਤੋਂ 42 ਸਾਲਾਂ ਤੋਂ ਵੱਧ ਸਮੇਂ ਤੱਕ ਪੱਤਰਕਾਰੀ ਦੀ ਉੱਤਮਤਾ ਦੇ ਸਿਖਰ ‘ਤੇ ਚੜ੍ਹ ਕੇ, ਹਮੇਸ਼ਾ, ਹਮੇਸ਼ਾ ਸੱਤਾ ਦੇ ਸਾਹਮਣੇ ਸੱਚ ਬੋਲਦੇ ਹੋਏ, ਉਸਨੇ ਇੱਕ ਬੇਮਿਸਾਲ ਜੀਵਨ ਬਤੀਤ ਕੀਤਾ। ਉਹ ਹੁਣ ਸਾਡੀ ਮਾਂ, ਉਨ੍ਹਾਂ ਦੀ ਪਿਆਰੀ ਪਤਨੀ ਚਿੰਨਾ ਦੇ ਨਾਲ ਸਵਰਗ ਵਿੱਚ ਹਨ, ਜਿਥੇ ਉਹ ਗਾਉਣਾ, ਖਾਣਾ ਬਣਾਉਣਾ, ਸਫ਼ਰ ਕਰਨਾ ਅਤੇ ਇੱਕ-ਦੂਜੇ ਨਾਲ ਲੜਨਾ-ਝਗੜਨਾ ਜਾਰੀ ਰੱਖਣਗੇ। ਸਸਕਾਰ ਕੱਲ੍ਹ (05.12.21) ਨੂੰ ਲੋਧੀ ਸ਼ਮਸ਼ਾਨਘਾਟ ਵਿਖੇ ਦੁਪਹਿਰ 12 ਵਜੇ ਕੀਤਾ ਜਾਵੇਗਾ।”
ਜੂਨ ਵਿੱਚ ਹੋਇਆ ਸੀ ਪਤਨੀ ਦਾ ਦੇਹਾਂਤ
ਦੱਸਣਯੋਗ ਹੈ ਕਿ ਵਿਨੋਦ ਦੁਆ ਅਤੇ ਉਹਨਾਂ ਦੀ ਪਤਨੀ ਕੋਰੋਨਾ ਦੀ ਦੂਜੀ ਲਹਿਰ ਦੇ ਦੌਰਾਨ ਮਹਾਂਮਾਰੀ ਦੀ ਚਪੇਟ ਵਿੱਚ ਆ ਗਏ ਸਨ। ਪੋਸਟ ਕੋਵਿਡ ਬਿਮਾਰੀਆਂ ਦੇ ਚਲਦੇ ਇਸੇ ਸਾਲ ਜੂਨ ਵਿੱਚ ਉਹਨਾਂ ਨੇ ਆਪਣੀ ਪਤਨੀ, ਰੇਡੀਓਲੋਜਿਸਟ ਪਦਮਾਵਤੀ ‘ਚਿੰਨਾ’ ਦੁਆ ਨੂੰ ਗੁਆ ਦਿੱਤਾ ਸੀ।
ਦੂਰਦਰਸ਼ਨ ਅਤੇ NDTV ਤੋਂ ਮਿਲੀ ਪਛਾਣ
ਵਿਨੋਦ ਦੁਆ ਨੇ NDTV ‘ਤੇ ‘ਖ਼ਬਰਦਾਰ ਇੰਡੀਆ’ ਅਤੇ ‘ਵਿਨੋਦ ਦੁਆ ਲਾਈਵ’ ਵਰਗੇ ਅਹਿਮ ਪ੍ਰੋਗਰਾਮ ਕੀਤੇ। NDTV ‘ਤੇ ‘ਜ਼ਾਇਕਾ ਇੰਡੀਆ ਦਾ’ ਵੀ ਉਹਨਾਂ ਦਾ ਚਰਚਿਤ ਪ੍ਰੋਗਰਾਮ ਰਿਹਾ। ਉਹਨਾਂ ਨੇ ਦੂਰਦਰਸ਼ਨ ‘ਤੇ ‘ਜਣਵਾਨੀ’ ਤੋਂ ਪਹਿਚਾਨ ਬਣਾਈ ਸੀ। ਉਹਨਾਂ ਨੂੰ ਬਿਹਤਰੀਨ ਚੋਣ ਵਿਸ਼ਲੇਸ਼ਕ ਵਜੋਂ ਵੀ ਜਾਣਿਆ ਜਾਂਦਾ ਹੈ।
