ਬਿਓਰੋ। ਪੰਜਾਬ ਵਿੱਚ ਨਵੇਂ DGP ਦੀ ਨਿਯੁਕਤੀ ਵਿੱਚ ਹੁਣ ਨਵਾਂ ਟਵਿਸਟ ਆ ਗਿਆ ਹੈ। ਦਰਅਸਲ, ਪੰਜਾਬ ਸਰਕਾਰ ਵੱਲੋਂ UPSC ਨੂੰ ਭੇਜੇ ਗਏ ਪੈਨਲ ਵਿੱਚ ਕਈ ਤਕਨੀਕੀ ਖਾਮੀਆਂ ਪਾਈਆਂ ਗਈਆਂ ਹਨ, ਜਿਸ ਤੋਂ ਬਾਅਦ ਕਮਿਸ਼ਨ ਨੇ ਪੰਜਾਬ ਦੇ ਗ੍ਰਹਿ ਵਿਭਾਗ ਤੋਂ ਇਸ ‘ਤੇ ਸਪੱਸ਼ਟੀਕਰਨ ਮੰਗਿਆ ਹੈ। ਇਸ ਤੋਂ ਬਾਅਦ ਹੀ UPSC 3 ਅਫ਼ਸਰਾਂ ਦਾ ਪੈਨਲ ਬਣਾ ਕੇ ਪੰਜਾਬ ਨੂੰ ਭੇਜੇਗੀ, ਜਿਹਨਾਂ ਵਿੱਚੋਂ ਕਿਸੇ ਇੱਕ ਅਫ਼ਸਰ ਨੂੰ DGP ਲਾਇਆ ਜਾਵੇਗਾ।
ਸੂਤਰਾਂ ਮੁਤਾਬਕ, UPSC ਨੂੰ ਭੇਜੀ ਲਿਸਟ ਵਿੱਚ DGP ਵੀਕੇ ਭਵਰਾ ਦੇ ਨਾਂਅ ਬਾਰੇ ਪੁੱਛਿਆ ਗਿਆ ਹੈ। ਪੈਨਲ ਵਿੱਚ ਇੱਕ ਜਗ੍ਹਾ ਉਹਨਾਂ ਦਾ ਨਾਂਅ ਸ਼ੌਰਟ ਵਿੱਚ ਲਿਖਿਆ ਹੈ, ਜਦਕਿ ਦੂਜੀ ਜਗ੍ਹਾ ਪੂਰਾ ਨਾਂਅ ਹੈ। ਗ੍ਰਹਿ ਵਿਭਾਗ ਨੂੰ ਪੁੱਛਿਆ ਗਿਆ ਕਿ ਇਹ ਇੱਕ ਹੀ ਅਫ਼ਸਰ ਦੇ ਵੱਖ-ਵੱਖ ਨਾਂਅ ਹਨ ਜਾਂ ਦੋਵੇਂ ਵੱਖ-ਵੱਖ ਅਫ਼ਸਰ ਹਨ। ਇਸੇ ਤਰ੍ਹਾਂ ਹਾਲ ਹੀ ਵਿੱਚ DGP ਅਹੁਦੇ ਤੋਂ ਹਟਾਏ ਗਏ ਦਿਨਕਰ ਗੁਪਤਾ ਦੀ ਜੁਆਇਨਿੰਗ ਦੀ ਤਾਰੀਖ ਵਿੱਚ ਵੀ ਕੁਝ ਗੜਬੜੀ ਹੈ, ਜਿਸ ਕਾਰਨ ਕਰੀਬ ਇੱਕ ਮਹੀਨਾ ਬੀਤ ਜਾਣ ਦੇ ਬਾਅਦ ਵੀ ਪੈਨਲ ਬਣ ਕੇ ਨਹੀਂ ਆਇਆ ਹੈ।
ਫਿਲਹਾਲ ਸਹੋਤਾ ਹਨ ਕਾਰਜਕਾਰੀ DGP
ਪੰਜਾਬ ਵਿੱਚ ਕੈਪਟਨ ਅਮਰਿੰਦਰ ਸਿੰਘ ਨੂੰ CM ਅਹੁਦੇ ਤੋਂ ਹਟਾਉਣ ਦੇ ਬਾਅਦ ਦਿਨਕਰ ਗੁਪਤਾ ਛੁੱਟੀ ‘ਤੇ ਚਲੇ ਗਏ ਸਨ। ਬਾਅਦ ਵਿੱਚ ਨਵੇਂ ਸੀਐੱਮ ਚਰਨਜੀਤ ਸਿੰਘ ਚੰਨੀ ਨੇ ਉਹਨਾਂ ਦੀ ਥਾਂ ਇਕਬਾਲਪ੍ਰੀਤ ਸਹੋਤਾ ਨੂੰ DGP ਦਾ ਚਾਰਜ ਦੇ ਦਿੱਤਾ। ਫਿਲਹਾਲ ਸਹੋਤਾ ਕਾਰਜਕਾਰੀ DGP ਦੇ ਤੌਰ ‘ਤੇ ਕੰਮ ਕਰ ਰਹੇ ਹਨ। ਚੋਣਾਂ ਦੇ ਐਲਾਨ ਵਿੱਚ ਕਰੀਬ 2 ਮਹੀਨਿਆਂ ਦਾ ਸਮਾਂ ਬਚਿਆ ਹੈ। ਅਜਿਹੇ ਵਿੱਚ ਪੈਨਲ ਵਿੱਚ ਦੇਰੀ ਨਾਲ ਕਈ ਵੱਡੇ ਦਾਅਵੇਦਾਰ ਕੁਰਸੀ ਤੋਂ ਵਾਂਝੇ ਹੋ ਸਕਦੇ ਹਨ।
ਵੱਧ ਸਕਦੀ ਹੈ ਸਿੱਧੂ ਦੀ ਨਰਾਜ਼ਗੀ
ਦਿਲਚਸਪ ਗੱਲ ਹੈ ਕਿ ਨਵਜੋਤ ਸਿੱਧੂ ਨੇ ਜਦੋਂ ਇਕਬਾਲਪ੍ਰੀਤ ਸਹੋਤਾ ਨੂੰ DGP ਲਗਾਉਣ ਦਾ ਵਿਰੋਧ ਕੀਤਾ, ਤਾਂ ਉਹਨਾਂ ਨੂੰ ਇਹੀ ਫਾਰਮੁਲਾ ਦਿੱਤਾ ਗਿਆ ਸੀ। ਸਿੱਧੂ ਨੂੰ ਕਿਹਾ ਗਿਆ ਸੀ ਕਿ UPSC ਨੂੰ ਪੈਨਲ ਭੇਜਿਆ ਹੈ। ਉਥੋਂ ਸੂਚੀ ਆਉਣ ਤੋਂ ਬਾਅਦ ਉਹਨਾਂ ਦੇ ਨਾਲ ਚਰਚਾ ਕਰਕੇ ਨਵਾਂ DGP ਲਗਾ ਦਿੱਤਾ ਜਾਵੇਗਾ। ਹਾਲਾਂਕਿ ਹੁਣ ਉਥੋਂ ਹੀ ਦੇਰੀ ਹੋਣ ‘ਤੇ ਸਹੋਤਾ ਅਹੁਦੇ ‘ਤੇ ਬਣੇ ਰਹਿਣਗੇ। ਸਿੱਧੂ, ਸਿਧਾਰਥ ਚਟੋਪਾਧਿਆਏ ਨੂੰ DGP ਲਗਾਉਣਾ ਚਾਹੁੰਦੇ ਸਨ। ਸਿੱਧੂ ਦਾ ਤਰਕ ਸੀ ਕਿ DGP ਸਹੋਤਾ ਨੇ ਬੇਅਦਬੀ ਕੇਸ ਵਿੱਚ ਬਾਦਲ ਸਰਕਾਰ ਨੂੰ ਕਲੀਨ ਚਿੱਟ ਦਿੱਤੀ ਸੀ। ਹਾਲਾਂਕਿ ਉਹਨਾਂ ਦੇ ਇਸ ਵਿਰੋਧ ਨੂੰ CM ਚੰਨੀ ਨੈ ਦਰਕਿਨਾਰ ਕਰ ਦਿੱਤਾ ਸੀ।
