ਬਿਓਰੋ। ਨਸ਼ਿਆਂ ਨੂੰ ਲੈ ਕੇ ਸਵਾਲਾਂ ‘ਚ ਘਿਰੇ ਪੰਜਾਬੀ ਹੁਣ ਬਾਹਰਲੇ ਮੁਲਕਾਂ ‘ਚ ਵੀ ਨਸ਼ਿਆਂ ਦੀ ਦਲਦਲ ‘ਚ ਫਸਦੇ ਜਾ ਰਹੇ ਹਨ। ਹਾਲ ਹੀ ‘ਚ ਕੈਨੇਡਾ ਪੁਲਿਸ ਨੇ ਓੰਟਾਰੀਓ ‘ਚ ਇੱਕ ਕੌਮਾਂਤਰੀ ਡਰੱਗ ਰੈਕੇਟ ਦਾ ਭੰਡਾਫੋੜ ਕੀਤਾ ਹੈ, ਜਿਸ ਤਹਿਤ ਨਸ਼ੇ ਅਤੇ ਹਥਿਆਰਾਂ ਦੀ ਵੱਡੀ ਖੇਪ ਬਰਾਮਦ ਕੀਤੀ ਗਈ ਹੈ।
ਮਈ 2020 ਯਾਨੀ ਕਰੀਬ ਇੱਕ ਸਾਲ ਪਹਿਲਾਂ ਸ਼ੁਰੂ ਹੋਏ “ਆਪਰੇਸ਼ਨ ਚੀਤਾ” ਦੇ ਤਹਿਤ ਇਹ ਕਾਮਯਾਬੀ ਪੁਲਿਸ ਦੇ ਹੱਥ ਲੱਗੀ ਹੈ। ਪੁਲਿਸ ਮੁਤਾਬਕ, 8 ਅਪ੍ਰੈਲ ਨੂੰ ਓਂਟਾਰੀਓ, ਬ੍ਰਿਟਿਸ਼ ਕੋਲੰਬੀਆ ਅਤੇ ਕੈਲੀਫੋਰਨੀਆ ‘ਚ 50 ਤੋਂ ਵੱਧ ਸਰਚ ਆਪਰੇਸ਼ਨ ਚਲਾਏ ਗਏ, ਜਿਸ ਦੌਰਾਨ 33 ਲੋਕਾਂ ‘ਤੇ 130 ਤੋਂ ਵੱਧ ਅਪਰਾਧਿਕ ਮਾਮਲੇ ਦਰਜ ਕੀਤੇ ਗਏ ਹਨ ਅਤੇ ਉਹਨਾਂ ਨੂੰ ਗ੍ਰਿਫ਼ਤਾਰ ਕੀਤਾ ਗਿਆ ਹੈ।
ਜਾਣਕਾਰੀ ਮੁਤਾਬਕ ਗ੍ਰਿਫ਼ਤਾਰ ਕੀਤੇ ਗਏ 33 ਲੋਕਾਂ ‘ਚੋਂ 25 ਪੰਜਾਬੀ ਹਨ, ਜਿਹਨਾਂ ਵੱਲੋਂ US ਦੇ ਕੈਲੀਫੋਰਨੀਆ ਅਤੇ ਭਾਰਤ ਤੋਂ ਨਸ਼ੇ ਦੀ ਖੇਪ ਕੈਨੇਡਾ ਪਹੁੰਚਾਈ ਜਾ ਰਹੀ ਸੀ। ਪੁਲਿਸ ਨੇ ਮੁਲਜ਼ਮਾਂ ਕੋਲੋਂ 2.3 ਮਿਲੀਅਨ ਡਾਲਰ ਦੀ ਕੀਮਤ ਦੇ ਨਸ਼ੇ ਦੀ ਖੇਪ ਬਰਾਮਦ ਕੀਤੀ ਹੈ, ਜਿਹਨਾਂ ‘ਚ 10 ਕਿੱਲੋ ਕੋਕੀਨ, 8 ਕਿੱਲੋ ਕੀਟਾਮਾਈਨ, 3 ਕਿਲੋ ਹੈਰੋਇਨ ਅਤੇ 2.5 ਕਿਲੋ ਅਫੀਮ ਸ਼ਾਮਲ ਹੈ।
ਇਸਦੇ ਨਾਲ ਹੀ 48 ਗੈਰ-ਕਾਨੂੰਨੀ ਹਥਿਆਰ ਵੀ ਬਰਾਮਦ ਹੋਏ ਹਨ। ਪੁਲਿਸ ਮੁਤਾਬਕ, ਇਹ ਸਾਰਾ ਰੈਕੇਟ ਹਵਾਲਾ ਜ਼ਰੀਏ ਚਲਾਇਆ ਜਾ ਰਿਹਾ ਸੀ। ਪੁਲਿਸ ਨੇ ਮੁਲਜ਼ਮਾਂ ਕੋਲੋਂ 730,000 ਕੈਨੇਡੀਅਨ ਡਾਲਰ ਵੀ ਬਰਾਮਦ ਕੀਤੇ ਹਨ।
ਯੌਰਕ ਰੀਜਨਲ ਪੁਲਿਸ ਦੇ ਇੰਸਪੈਕਟਰ ਰਯਾਨ ਹੋਗਨ ਮੁਤਾਬਕ, ਬ੍ਰੈਂਪਟਨ ‘ਚ ਇੱਕ ਪਲੇਅ ਲੈਂਡ ਤੋਂ ਵੀ ਹੈਰੋਇਨ ਦੀ ਬਰਾਮਦਗੀ ਹੋਈ ਹੈ, ਜੋ ਬੇਹੱਦ ਚਿੰਤਾ ਦਾ ਵਿਸ਼ਾ ਹੈ। ਉਹਨਾਂ ਕਿਹਾ ਕਿ ਪਲੇਅ ਲੈਂਡ ਤੋਂ ਹੈਰੋਇਨ ਦੀ ਖੇਪ ਮਿਲਣ ਦਾ ਮਤਬਲ ਸਾਫ਼ ਹੈ ਕਿ ਨਾ ਸਿਰਫ਼ ਇੱਕ ਕਮਿਊਨਿਟੀ, ਬਲਕਿ ਬੱਚਿਆਂ ਲਈ ਵੀ ਇਸ ਤਰ੍ਹਾਂ ਦੇ ਗਿਰੋਹ ਖ਼ਤਰਾ ਬਣ ਰਹੇ ਹਨ।
ਕਰੀਬ ਇੱਕ ਸਾਲ ਤੱਕ ਚੱਲੇ ਇਸ “ਆਪਰੇਸ਼ਨ ਚੀਤਾ” ਨੂੰ ਯੌਰਕ ਰੀਜਨਲ ਪੁਲਿਸ ਨੇ ਵੱਖ-ਵੱਖ ਪੁਲਿਸ ਏਜੰਸੀਆਂ ਨਾਲ ਮਿਲ ਕੇ ਚਲਾਇਆ ਸੀ। ਇਸ ਆਪਰੇਸ਼ਨ ‘ਚ ਰਾਇਲ ਕੈਨੇਡੀਅਨ ਮਾਊਂਟਿਡ ਪੁਲਿਸ, ਪੀਲ ਰੀਜਨਲ ਪੁਲਿਸ ਅਤੇ US ਡਰੱਗ ਇਨਫੋਰਸਮੈਂਟ ਐਡਮਿਨਿਸਟ੍ਰੇਸ਼ਨ ਵੱਲੋਂ ਸਾਂਝੇ ਤੌਰ ‘ਤੇ ਕਾਰਵਾਈ ਕੀਤੀ ਗਈ।
ਇਸ ਪ੍ਰੋਜੈਕਟ ਦੀ ਪੂਰੀ ਜਾਣਕਾਰੀ ਯੌਰਕ ਰੀਜਨਲ ਪੁਲਿਸ (YRP) ਵੱਲੋਂ ਆਪਣੇ ਆਫੀਸ਼ੀਅਲ ਯੂ-ਟਿਊਬ ਅਕਾਊਟ ‘ਤੇ ਵੀ ਸਾਂਝੀ ਕੀਤੀ ਗਈ ਹੈ। ਇਥੇ ਸੁਣੋ:- https://www.youtube.com/watch?v=5A9yLlbtqN8&t=132s
