ਬਿਓਰੋ। ਸਾਲ 2015 ‘ਚ ਜਦੋਂ ਫ਼ਰੀਦਕੋਟ ਦੇ ਪਿੰਡ ਬੁਰਜ ਜਵਾਹਰ ਸਿੰਘ ਵਾਲਾ ਤੋਂ ਸ੍ਰੀ ਗੁਰੂ ਗ੍ਰੰਥ ਸਾਹਿਬ ਜੀ ਦੇ ਸਰੂਪ ਚੋਰੀ ਹੋਏ ਅਤੇ ਉਹਨਾਂ ਦੀ ਬੇਅਦਬੀ ਕੀਤੀ ਗਈ, ਉਸ ਵੇਲੇ ਕਿਸੇ ਨੇ ਨਹੀਂ ਸੋਚਿਆ ਸੀ ਕਿ 6 ਸਾਲ ਦਾ ਲੰਮਾ ਸਮਾਂ ਬੀਤ ਜਾਣ ਦੇ ਬਾਵਜੁੂਦ ਬੇਅਦਬੀ ਦੇ ਦੋਸ਼ੀ ਫੜੇ ਨਹੀਂ ਜਾਣਗੇ। ਇੰਨਾ ਹੀ ਨਹੀਂ, ਇਸ ਮਾਮਲੇ ਦੇ 4 ਮੁੱਖ ਮੁਲਜ਼ਮਾਂ ਦਾ ਤਾਂ ਅੱਜ ਤੋਂ ਪਹਿਲਾਂ ਤੱਕ ਕੋਈ ਥਹੁ-ਪਤਾ ਵੀ ਨਹੀਂ ਸੀ।
ਅਜਿਹੇ ‘ਚ ਹੁਣ 2 ਡੇਰਾ ਪ੍ਰੇਮੀਆਂ ਵੱਲੋਂ ਅਜਿਹੇ 4 ਮੁਲਜ਼ਮਾਂ ਨੂੰ ਸਿਰਸਾ ‘ਚ ਵੇਖੇ ਜਾਣ ਦਾ ਦਾਅਵਾ ਕੀਤਾ ਗਿਆ ਹੈ, ਜੋ ਸਾਲਾਂ ਤੋਂ ਪੁਲਿਸ ਦੀ ਗ੍ਰਿਫ਼ਤ ਤੋਂ ਬਾਹਰ ਹਨ। ਇਹਨਾਂ ਚਾਰੇ ਮੁਲਜ਼ਮਾਂ ਦੀਆਂ ਤਸਵੀਰਾਂ ਹੁਣ 2 ਡੇਰਾ ਪ੍ਰੇਮੀਆਂ ਵੱਲੋਂ ਹੀ ਜਾਰੀ ਕੀਤੀਆਂ ਗਈਆਂ ਹਨ। ਇਹ ਚਾਰ ਮੁਲਜ਼ਮ ਹਨ- ਪ੍ਰਦੀਪ ਕਲੇਰ, ਹਰਸ਼ ਧੁਰੀ, ਸੰਦੀਪ ਬਰੇਟਾ ਅਕੇ ਰਾਕੇਸ਼ ਦਿੜ੍ਹਬਾ। ਇਹਨਾਂ ਦੇ ਨਾੰਅ ਜਸਟਿਸ ਰਣਜੀਤ ਸਿੰਘ ਕਮਿਸ਼ਨ ਵੱਲੋਂ ਆਪਣੀ ਜਾਂਚ ਰਿਪੋਰਟ ‘ਚ ਸ਼ਾਮਲ ਕੀਤੇ ਗਏ ਸਨ। ਇਹਨਾਂ ‘ਤੇ ਡੇਰਾ ਪ੍ਰੇਮੀ ਮੋਹਿੰਦਰਪਾਲ ਬਿੱਟੂ ਨਾਲ ਮਿਲ ਕੇ ਬੇਅਦਬੀਆਂ ਦੀ ਅਪਰਾਧਿਕ ਸਾਜ਼ਿਸ਼ ਰਚਣ ਦਾ ਇਲਜ਼ਾਮ ਹੈ।
ਸਿਰਸਾ ਦੇ ਇੱਕ ਪਿੰਡ ‘ਤੇ ਸ਼ਰਨ ਦੇਣ ਦਾ ਇਲਜ਼ਾਮ
ਡੇਰਾ ਪ੍ਰੇਮੀਆਂ ਵੱਲੋਂ ਜਾਰੀ ਬਿਆਨ ‘ਚ ਦਾਅਵਾ ਕੀਤਾ ਗਿਆ ਹੈ ਕਿ ਇਹ ਸਾਰੇ ਮੁਲਜ਼ਮ ਸਿਰਸਾ ‘ਚ ਪਿੰਡ ਸ਼ਾਹ ਸਤਨਾਮ ਪੁਰਾ ਦੀ ਪੰਚਾਇਤ ਨੇ ਆਪਣੇ ਪਿੰਡ ‘ਚ ਸ਼ਰਨ ਦਿੱਤੀ ਹੋਈ ਹੈ। ਅਤੇ ਹੋ ਸਕਦਾ ਹੈ ਕਿ ਪੰਚਾਇਤ ਵੱਲੋਂ ਪੁਲਿਸ ਨੂੰ ਵੀ ਗੁੰਮਰਾਹ ਕੀਤਾ ਜਾ ਰਿਹਾ ਹੋਵੇ।
ਦਾਅਵਾ ਇਹ ਵੀ ਹੈ ਕਿ ਪ੍ਰਦੀਪ ਕਲੇਰ ਨੂੰ ਬੀਤੀ 25 ਮਾਰਚ ਨੂੰ ਕੈਥਲ ‘ਚ ਇੱਕ ਵਿਆਹ ਸਮਾਗਮ ਦੌਰਾਨ ਡਾਂਸ ਕਰਦੇ ਵੇਖਿਆ ਗਿਆ, ਜਿਸਦੀ ਤਸਵੀਰ ਵੀ ਜਾਰੀ ਕੀਤੀ ਗਈ ਹੈ। ਬਿਆਨ ‘ਚ ਕਿਹਾ ਗਿਆ ਹੈ ਕਿ ਪ੍ਰਦੀਪ ਕਲੇਰ ਦੇ 25 ਮਾਰਚ ਨੂੰ ਕੈਥਲ ‘ਚ ਹੋਣ ਬਾਰੇ ਉਥੋਂ ਦੇ SP ਨੂੰ ਵੀ 15 ਅਪ੍ਰੈਲ ਨੂੰ ਸੂਚਿਤ ਕਰ ਦਿੱਤਾ ਗਿਆ ਸੀ।
ਇਸ ਤੋਂ ਇਲਾਵਾ ਮੁਲਜ਼ਮ ਹਰਸ਼ ਧੁਰੀ ਨੂੰ 31 ਮਈ, 2020 ਨੂੰ ਸਿਰਸਾ ‘ਚ ਵੇਖੇ ਜਾਣ ਦਾ ਸਬੂਤ ਵੀ ਜਾਰੀ ਕੀਤਾ ਗਿਆ ਹੈ। ਬਿਆਨ ‘ਚ ਕਿਹਾ ਗਿਆ ਹੈ ਕਿ ਰਾਜ ਕੁਮਾਰ ਨਾੰਅ ਦੇ ਡੇਰਾ ਪ੍ਰੇਮੀ ਨੇ ਹਰਸ਼ ਧੂਰੀ ਦੀ ਇੱਕ ਤਸਵੀਰ ਸੋਸ਼ਲ ਮੀਡੀਆ ‘ਤੇ ਅਪਲੋਡ ਕੀਤੀ ਸੀ, ਜਿਸ ‘ਚ ਉਹ ਇੱਕ ਕਾਰ ‘ਚ ਬੈਠਿਆ ਨਜ਼ਰ ਆ ਰਿਹਾ ਹੈ।
ਇਸੇ ਤਰ੍ਹਾਂ ਰਾਕੇਸ਼ ਦਿੜ੍ਹਬਾ ਦੇ ਰੋਜ਼ਾਨਾ ਡੇਰਾ ਸਿਰਸਾ ‘ਚ ਵੇਖੇ ਜਾਣ ਦੀ ਗੱਲ ਵੀ ਕਹੀ ਗਈ ਹੈ। ਹਾਲਾਂਕਿ ਸੰਦੀਪ ਬਰੇਟਾ ਬਾਰੇ ਕੋਈ ਅਜਿਹੀ ਜਾਣਕਾਰੀ ਸਾਂਝੀ ਨਹੀਂ ਕੀਤੀ ਗਈ।
ਕਾਬਿਲੇਗੌਰ ਹੈ ਕਿ ਰਾਕੇਸ਼ ਦਿੜ੍ਹਬਾ ਰਾਮ ਰਹੀਮ ਦਾ ਪੀਏ ਰਹਿ ਚੁੱਕਿਆ ਹੈ। ਅਜਿਹੇ ‘ਚ ਜੇਕਰ ਪੁਲਿਸ ਉਸ ਨੂੰ ਫੜਨ ‘ਚ ਕਾਮਯਾਬ ਹੁੰਦੀ ਹੈ, ਤਾਂ ਕਈ ਅਹਿਮ ਖੁਲਾਸੇ ਹੋ ਸਕਦੇ ਹਨ। ਹਾਲਾਂਕਿ ਫਿਲਹਾਲ ਤੱਕ ਪੁਲਿਸ ਉਸ ਨੂੰ ਕਾਬੂ ਕਰਨ ‘ਚ ਨਾਕਾਮਯਾਬ ਰਹੀ ਹੈ।
