ਬਿਓਰੋ। ਯੋਗ ਗੁਰੂ ਬਾਬਾ ਰਾਮਦੇਵ ਨੇ ਐਲੋਪੈਥੀ ਬਾਰੇ ਦਿੱਤਾ ਆਪਣਾ ਬਿਆਨ ਵਾਪਸ ਲੈ ਲਿਆ ਹੈ। ਇੰਡੀਅਨ ਮੈਡੀਕਲ ਐਸੋਸੀਏਸ਼ਨ ਵੱਲੋਂ ਕੇਂਦਰੀ ਸਿਹਤ ਮੰਤਰੀ ਨੂੰ ਰਾਮਦੇਵ ਦੇ ਬਿਆਨ ਦੀ ਸ਼ਿਕਾਇਤ ਕੀਤੇ ਜਾਣ ਤੋਂ ਬਾਅਦ ਡਾ. ਹਰਸ਼ ਵਰਧਨ ਨੇ ਤੁਰੰਤ ਮਾਮਲੇ ‘ਚ ਦਖਲ ਦਿੱਤਾ ਅਤੇ ਰਾਮਦੇਵ ਨੂੰ ਆਪਣਾ ਬਿਆਨ ਵਾਪਸ ਲੈਣ ਲਈ ਆਖਦਿਆਂ ਚਿੱਠੀ ਲਿਖ ਦਿੱਤੀ।
ਸਿਹਤ ਮੰਤਰੀ ਨੇ ਆਪਣੀ ਚਿੱਠੀ ‘ਚ ਇਹ ਲਿਖਿਆ-
ਬਾਬਾ ਰਾਮਦੇਵ ਨੂੰ ਭੇਜੀ ਆਪਣੀ ਚਿੱਠੀ ‘ਚ ਸਿਹਤ ਮੰਤਰੀ ਨੇ ਕਿਹਾ, “ਕੋਰੋਨਾ ਖਿਲਾਫ਼ ਦਿਨ-ਰਾਤ ਕੰਮ ਕਰ ਰਹੇ ਡਾਕਟਰ ਅਤੇ ਹੋਰ ਸਿਹਤਕਰਮੀ ਭਗਵਾਨ ਦੇ ਬਰਾਬਰ ਹਨ। ਤੁਸੀਂ ਆਪਣੇ ਬਿਆਨ ਨਾਲ ਨਾ ਸਿਰਫ਼ ਉਹਨਾਂ ਦਾ ਨਿਰਾਦਰ ਕੀਤਾ ਹੈ, ਬਲਕਿ ਦੇਸ਼ਵਾਸੀਆਂ ਦੀਆਂ ਭਾਵਨਾਵਾਂ ਨੂੰ ਵੀ ਠੇਸ ਪਹੁੰਚਾਈ ਹੈ।ਤੁਹਾਡੇ ਵੱਲੋਂ ਬੀਤੇ ਦਿਨ ਜਾਰੀ ਕੀਤਾ ਗਿਆ ਸਪੱਸ਼ਟੀਕਰਨ ਲੋਕਾਂ ਦੇ ਜ਼ਖਮਾਂ ‘ਤੇ ਮੱਲ੍ਹਮ ਲਾਉਣ ਲਈ ਨਾਕਾਫ਼ੀ ਹੈ।” ਉਹਨਾਂ ਕਿਹਾ ਕਿ ਤੁਹਾਡਾ ਬਿਆਨ ਡਾਕਟਰਾਂ ਦੇ ਮਨੋਬਲ ਨੂੰ ਤੋੜਨ ਅਤੇ ਕੋਰੋਨਾ ਮਹਾਂਮਾਰੀ ਖਿਲਾਫ਼ ਸਾਡੀ ਲੜਾਈ ਨੂੰ ਕਮਜ਼ੋਰ ਕਰਨ ਵਾਲਾ ਸਾਬਿਤ ਹੋਵੇਗਾ।
ਸਿਹਤ ਮੰਤਰੀ ਨੇ ਅੱਗੇ ਲਿਖਿਆ, “ਕੋਰੋਨਾ ਸੰਕਟ ‘ਚ ਐਲੋਪੈਥੀ ਅਤੇ ਇਸਦੇ ਨਾਲ ਜੁੜੇ ਡਾਕਟਰਾਂ ਨੇ ਕਰੋੜਾਂ ਲੋਕਾਂ ਨੂੰ ਨਵਾਂ ਜੀਵਨਦਾਨ ਦਿੱਤਾ ਹੈ, ਅਜਿਹੇ ‘ਚ ਤੁਹਾਡਾ ਇਹ ਕਹਿਣਾ ਬੇਹੱਦ ਮੰਦਭਾਗਾ ਹੈ ਕਿ ਲੱਖਾਂ ਕੋਰੋਨਾ ਮਰੀਜ਼ਾਂ ਦੀ ਮੌਤ ਐਲੋਪੈਥੀ ਦਵਾਈਆਂ ਨਾਲ ਹੋਈ ਹੈ। ਤੁਹਾਡੇ ਵੱਲੋਂ ਐਲੋਪੈਥੀ ਇਲਾਜ ਨੂੰ ਤਮਾਸ਼ਾ, ਬੇਕਾਰ ਅਤੇ ਦੀਵਾਲੀਆ ਦੱਸਣਾ ਵੀ ਬੇਹੱਦ ਮੰਦਭਾਗਾ ਹੈ। ਜੇਕਰ ਅੱਜ ਦੇਸ਼ ਦਾ ਰਿਕਵਰੀ ਰੇਟ ਕਾਫ਼ੀ ਵਧੀਆ ਹੈ, ਤਾਂ ਉਸ ‘ਚ ਐਲੋਪੈਥੀ ਅਤੇ ਉਸ ਨਾਲ ਜੁੜੇ ਡਾਕਟਰਾਂ ਦਾ ਅਹਿਮ ਯੋਗਦਾਨ ਹੈ।”
ਜਵਾਬ ‘ਚ ਰਾਮਦੇਵ ਨੇ ਇਹ ਬਿਆਨ ਦਿੱਤਾ-
ਸਿਹਤ ਮੰਤਰੀ ਡਾ. ਹਰਸ਼ ਵਰਧਨ ਦੀ ਚਿੱਠੀ ਦਾ ਜਵਾਬ ਦੇਣ ‘ਚ ਰਾਮਦੇਵ ਨੇ ਵੀ ਜ਼ਿਆਦਾ ਸਮਾਂ ਨਹੀਂ ਲਗਾਇਆ। ਆਪਣੇ ਜਵਾਬ ‘ਚ ਰਾਮਦੇਵ ਨੇ ਆਪਣਾ ਬਿਆਨ ਤਾਂ ਵਾਪਸ ਲਿਆ, ਖੇਦ ਵੀ ਜਤਾਇਆ, ਪਰ ਨਾਲ ਹੀ ਇਹ ਵੀ ਕਹਿ ਦਿੱਤਾ ਕਿ ਐਲੋਪੈਥੀ ਦੇ ਨਾਲ-ਨਾਲ ਯੋਗ ਅਤੇ ਆਯੁਰਵੇਦ ਨੂੰ ਵੀ ਸਨਮਾਨ ਮਿਲਣਾ ਚਾਹੀਦਾ ਹੈ।
ਰਾਮਦੇਵ ਨੇ ਲਿਖਿਆ, “ਅਸੀਂ ਆਧੁਨਿਕ ਚਿਕਿਤਸਾ ਵਿਗਿਆਨ ਅਤੇ ਐਲੋਪੈਥੀ ਦੇ ਵਿਰੋਧੀ ਨਹੀਂ। ਐਲੋਪੈਥੀ ਨੇ ਬਹੁਤ ਤਰੱਕੀ ਕੀਤੀ ਹ ਅਤੇ ਮਨੁੱਖਤਾ ਦੀ ਸੇਵਾ ਵੀ ਕੀਤੀ ਹੈ। ਸਾਰਿਆਂ ਨੂੰ ਆਤਮ-ਮੂਲਾਂਕਣ ਕਰਦੇ ਹੋਏ ਤਰੱਕੀ ਕਰਦੇ ਰਹਿਣਾ ਚਾਹੀਦਾ ਹੈ, ਪਰ ਕੁਝ ਐਲੋਪੈਥੀ ਡਾਕਟਰਾਂ ਵੱਲੋਂ ਯੋਗ ਅਤੇ ਆਯੁਰਵੇਦ ਨੂੰ pseudo science ਕਹਿ ਕੇ ਉਸਦਾ ਨਿਰਾਦਰ ਨਹੀਂ ਕਰਨਾ ਚਾਹੀਦਾ, ਕਿਉਂਕਿ ਇਸ ਨਾਲ ਵੀ ਕਰੋੜਾਂ ਲੋਕਾਂ ਦੀਆਂ ਭਾਵਨਾਵਾਂ ਨੁੂੰ ਠੇਸ ਪਹੁੰਚਦੀ ਹੈ।”
ਉਹਨਾਂ ਅੱਗੇ ਕਿਹਾ, “ਕੋਰੋਨਾ ਕਾਲ ‘ਚ ਵੀ ਐਲੋਪੈਥੀ ਦੇ ਡਾਕਟਰਾਂ ਨੇ ਆਪਣੀ ਜਾਨ ਜੋਖਿਮ ‘ਚ ਪਾ ਕੇ ਕਰੋੜਾਂ ਲੋਕਾਂ ਦੀ ਜਾਨ ਬਚਾਈ, ਅਸੀਂ ਉਸਦਾ ਸਨਮਾਨ ਕਰਦੇ ਹਾਂ। ਪਰ ਅਸੀਂ ਵੀ ਆਯੁਰਵੇਦ ਅਤੇ ਯੋਗ ਦੇ ਜ਼ਰੀਏ ਕਰੋੜਾਂ ਲੋਕਾਂ ਦੀ ਜਾਨ ਬਚਾਈ ਹੈ, ਇਸਦਾ ਵੀ ਸਨਮਾਨ ਹੋਣਾ ਚਾਹੀਦਾ ਹੈ।” ਰਾਮਦੇਵ ਨੇ ਆਪਣੇ ਬਿਆਨ ਬਾਰੇ ਬੋਲਦਿਆਂ ਕਿਹਾ ਕਿ ਜਿਸ ਬਿਆਨ ਕਾਰਨ ਇਹ ਸਾਰਾ ਵਿਵਾਦ ਖੜ੍ਹਾ ਹੋਇਆ ਹੈ, ਉਹ ਇੱਕ ਵਰਕਰਾਂ ਦੀ ਬੈਠਕ ‘ਚ ਦਿੱਤਾ ਬਿਆਨ ਹੈ। ਉਹਨਾਂ ਕਿਹਾ, “ਮੈੰ ਵਟਸਐਪ ‘ਤੇ ਆਏ ਹੋਏ ਮੈਸੇਜ ਨੂੰ ਪੜ੍ਹ ਕੇ ਸੁਣਾਇਆ ਸੀ, ਉਸ ਨਾਲ ਜੇਕਰ ਕਿਸੇ ਦੀਆਂ ਭਾਵਨਾਵਾਂ ਨੂੰ ਠੇਸ ਪਹੁੰਚੀ ਹੈ, ਤਾਂ ਇਸਦਾ ਮੈਨੂੰ ਦੁੱਖ ਹੈ।”
IMA ਨੇ ਇੱਕ ਦਿਨ ਪਹਿਲਾਂ ਲਿਖਿਆ ਸੀ ਪੱਤਰ
ਇਸ ਤੋਂ ਪਹਿਲਾਂ ਸ਼ਨੀਵਾਰ ਨੂੰ ਇੰਡੀਅਨ ਮੈਡੀਕਲ ਐਸੋਸੀਏਸ਼ਨ ਨੇ ਯੋਗ ਗੁਰੂ ਬਾਬਾ ਰਾਮਦੇਵ ‘ਤੇ ਐਲੋਪੈਥੀ ਇਲਾਜ ਦੇ ਖਿਲਾਫ਼ ਝੂਠ ਫੈਲਾਉਣ ਦਾ ਇਲਜ਼ਾਮ ਲਾਇਆ ਸੀ। ਕੇਂਦਰੀ ਸਿਹਤ ਮੰਤਰੀ ਡਾ. ਹਰਸ਼ਵਰਧਨ ਨੂੰ ਲਿਖੇ ਪੱਤਰ ‘ਚ IMA ਨੇ ਕਿਹਾ ਸੀ ਕਿ ਸੋਸ਼ਲ ਮੀਡੀਆ ‘ਤੇ ਰਾਮਦੇਵ ਦੀ ਇੱਕ ਵੀਡੀਓ ਵਾਇਰਲ ਹੋ ਰਹੀ ਹੈ, ਜਿਸ ‘ਚ ਬਾਬਾ ਐਲੋਪੈਥੀ ਨੂੰ ਬਕਵਾਸ ਅਤੇ ਦਿਵਾਲੀਆ ਸਾਉੰਸ ਕਹਿ ਰਹੇ ਹਨ। ਸ਼ਨੀਵਾਰ ਸ਼ਾਮ IMA ਨੇ ਰਾਮਦੇਵ ਨੂੰ ਇੱਕ ਲੀਗਲ ਨੋਟਿਸ ਵੀ ਭੇਜਿਆ ਸੀ ਅਤੇ ਰਾਮਦੇਵ ਖਿਲਾਫ਼ ਮੁਕੱਦਮਾ ਚਲਾਉਣ ਦੀ ਮੰਗ ਕੀਤੀ ਸੀ। (ਪੂਰੀ ਖ਼ਬਰ ਇਥੇ ਪੜ੍ਹੋ)
