ਬਿਓਰੋ। ਯੋਗ ਗੁਰੂ ਬਾਬਾ ਰਾਮਦੇਵ ਇੱਕ ਵਾਰ ਫਿਰ ਇੰਡੀਅਨ ਮੈਡੀਕਲ ਐਸੋਸੀਏਸ਼ਨ ਦੇ ਨਿਸ਼ਾਨੇ ‘ਤੇ ਹਨ। ਦੇਸ਼ ‘ਚ ਡਾਕਟਰਾਂ ਦੀ ਸਭ ਤੋਂ ਵੱਡੀ ਸੰਸਥਾ IMA ਨੇ ਬਾਬਾ ਰਾਮਦੇਵ ‘ਤੇ ਐਲੋਪੈਥੀ ਇਲਾਜ ਦੇ ਖਿਲਾਫ਼ ਝੂਠ ਫੈਲਾਉਣ ਦਾ ਇਲਜ਼ਾਮ ਲਗਾਇਆ ਹੈ। ਕੇਂਦਰੀ ਸਿਹਤ ਮੰਤਰੀ ਡਾ. ਹਰਸ਼ਵਰਧਨ ਨੂੰ ਲਿਖੇ ਪੱਤਰ ‘ਚ IMA ਨੇ ਕਿਹਾ, “ਸੋਸ਼ਲ ਮੀਡੀਆ ‘ਤੇ ਰਾਮਦੇਵ ਦੀ ਇੱਕ ਵੀਡੀਓ ਵਾਇਰਲ ਹੋ ਰਹੀ ਹੈ, ਜਿਸ ‘ਚ ਉਹ ਐਲੋਪੈਥੀ ਨੂੰ ਬਕਵਾਸ ਅਤੇ ਦਿਵਾਲੀਆ ਸਾਇੰਸ ਕਹਿ ਰਹੇ ਹਨ।”
ਰਾਮਦੇਵ ਦੇ ਦਾਅਵੇ DCGI ਨੂੰ ਚੁਣੌਤੀ- IMA
IMA ਦੇ ਮੁਤਾਬਕ, “ਬਾਬਾ ਰਾਮਦੇਵ ਨੇ ਇਹ ਦਾਅਵਾ ਕੀਤਾ ਹੈ ਕਿ ਰੇਮਡੇਸਿਵਿਰ ਅਤੇ DCGI ਤੋਂ ਮਨਜ਼ੂਰ ਦੂਜੀਆਂ ਦਵਾਈਆਂ ਕਾਰਨ ਲੱਖਾਂ ਲੋਕਾਂ ਦੀ ਮੌਤ ਹੋਈ ਹੈ।” IMA ਨੇ ਕਿਹਾ ਕਿ ਰਾਮਦੇਵ ਨੇ ਅਜਿਹਾ ਕਹਿ ਕੇ ਸਿੱਧੇ ਡਰੱਗਜ਼ ਕੰਟਰੋਲਰ ਜਨਰਲ ਆਫ ਇੰਡੀਆ(DCGI) ਅਤੇ ਸਿਹਤ ਮੰਤਰਾਲੇ ਦੀ ਸਾਖ ਨੂੰ ਚੁਣੌਤੀ ਦਿੱਤੀ ਹੈ। ਕੋਰੋਨਾ ਮਰੀਜ਼ਾਂ ਦੇ ਇਲਾਜ ‘ਚ ਰੇਮਡੇਸਿਵਿਰ ਦੇ ਇਸਤੇਮਾਲ ਦੀ ਮਨਜ਼ੂਰੀ ਕੇਂਦਰ ਦੀ ਸੰਸਥਾ ਸੈਂਟਰਲ ਡਰੱਗਜ਼ ਕੰਟਰੋਲ ਆਰਗੇਨਾਈਜ਼ੇਸ਼ਨ(CDSCO) ਨੇ ਜੂਨ-ਜੁਲਾਈ 2020 ‘ਚ ਦਿੱਤੀ ਸੀ।
ਰਾਮਦੇਵ ਨੇ ਡਾਕਟਰਾਂ ਨੂੰ ਕਾਤਲ ਵੀ ਕਿਹਾ-IMA
IMA ਦੇ ਮੁਤਾਬਕ, ਇਸ ਤੋਂ ਪਹਿਲਾਂ ਕੋਰੋਨਾ ਲਈ ਬਣਾਈ ਗਈ ਆਪਣੀ ਦਵਾਈ ਦੀ ਲਾਂਚਿੰਗ ਵੇਲੇ ਵੀ ਰਾਮਦੇਵ ਨੇ ਡਾਕਟਰਾਂ ਨੂੰ ਕਾਲਤ ਵੀ ਕਿਹਾ ਸੀ। ਇਸ ਦੌਰਾਨ ਸਿਹਤ ਮੰਤਰੀ ਵੀ ਮੌਜੂਦ ਸਨ। IMA ਨੇ ਇਹ ਵੀ ਲਿਖਿਆ ਹੈ ਕਿ ਕੋਰੋਨਾ ਮਹਾਂਮਾਰੀ ਦੇ ਚਲਦੇ ਦੇਸ਼ ਇਸ ਵੇਲੇ ਹੈਲਥ ਐਮਰਜੈਂਸੀ ਦੇ ਦੌਰ ‘ਚੋ ਲੰਘ ਰਿਹਾ ਹੈ। ਵਾਇਰਸ ਦੀ ਵਜ੍ਹਾ ਨਾਲ ਹੁਣ ਤੱਕ ਲੱਖਾਂ ਲੋਕਾਂ ਦੀ ਜਾਨ ਜਾ ਚੁੱਕੀ ਹੈ॥ ਡਾਕਟਰ ਅਤੇ ਮੈਡੀਕਲ ਸਟਾਫ ਸਰਕਾਰ ਦੇ ਨਾਲ ਮਿਲ ਕੇ ਇਸ ਨੂੰ ਰੋਕਣ ਦੀ ਕੋਸ਼ਿਸ਼ ‘ਚ ਲੱਗੇ ਹੋਏ ਹਨ, ਪਰ ਰਾਮਦੇਵ ਭਰਮ ਫੈਲਾਉਣ ‘ਚ ਲੱਗੇ ਹੋਏ ਹਨ।
ਰਾਮਦੇਵ ‘ਤੇ ਮੁਕੱਦਮਾ ਚਲਾਉਣ ਦੀ ਮੰਗ
ਸਿਹਤ ਮੰਤਰੀ ਨੂੰ ਲਿਖੇ ਪੱਤਰ ‘ਚ ਡਾਕਟਰਾਂ ਦੀ ਸੰਸਥਾ ਨੇ ਇਹ ਦਾਅਵਾ ਵੀ ਕੀਤਾ ਹੈ ਕਿ ਬਾਬਾ ਰਾਮਦੇਵ ਅਤੇ ਉਹਨਾਂ ਦੇ ਸਾਥੀ ਬਾਲਕ੍ਰਿਸ਼ਨਣ ਬਿਮਾਰ ਹੋਣ ‘ਤੇ ਐਲੋਪੈਥੀ ਇਲਾਜ ਲੈਂਦੇ ਹਨ। ਇਸ ਤੋਂ ਬਾਅਦ ਵੀ ਆਪਣੀ ਨਜਾਇਜ਼ ਦਵਾਈ ਨੂੰ ਵੇਚਣ ਲਈ ਉਹ ਲਗਾਤਾਰ ਐਲੋਪੈਥੀ ਬਾਰੇ ਭਰਮ ਫੈਲਾ ਰਹੇ ਹਨ। ਇਸ ਨਾਲ ਇੱਕ ਵੱਡੀ ਅਬਾਦੀ ‘ਤੇ ਅਸਰ ਪੈ ਰਿਹਾ ਹੈ। IMA ਨੇ ਰਾਮਦੇਵ ‘ਤੇ ਭਰਮ ਫੈਲਾਉਣ ਅਤੇ ਲੱਖਾਂ ਲੋਕਾਂ ਦੀ ਜਾਨ ਖ਼ਤਰੇ ‘ਚ ਪਾਉਣ ਲਈ ਮੁਕੱਦਮਾ ਚਲਾਏ ਜਾਣ ਦੀ ਮੰਗ ਕੀਤੀ ਹੈ।
ਪਾਤੰਜਲੀ ਨੇ ਨਕਾਰੇ ਡਾਕਟਰਾਂ ਦੇ ਇਲਜ਼ਾਮ
IMA ਵੱਲੋਂ ਸਿਹਤ ਮੰਤਰੀ ਨੂੰ ਲਿਖੇ ਗਏ ਇਸ ਪੱਤਰ ਦੇ ਜਵਾਬ ‘ਚ ਪਾਤੰਜਲੀ ਯੋਗਪੀਠ ਦਾ ਬਿਆਨ ਵੀ ਸਾਹਮਣੇ ਆਇਆ ਹੈ। ਇਸ ਬਿਆਨ ‘ਚ ਕਿਹਾ ਗਿਆ ਹੈ, “ਆਧੁਨਿਕ ਵਿਗਿਆਨ ਅਤੇ ਆਧੁਨਿਕ ਦਵਾਈ ਦੇ ਚੰਗੇ ਪ੍ਰੈਕਟੀਸ਼ਨਰਾਂ ਪ੍ਰਤੀ ਸਵਾਮੀ ਜੀ ਦਾ ਨਜ਼ਰੀਏ ਬਿਲਕੁੱਲ ਗਲਤ ਨਹੀਂ ਹੈ। ਜੋ ਉਹਨਾਂ ਖਿਲਾਫ਼ ਫੈਲਾਇਆ ਜਾ ਰਿਹਾ ਹੈ, ਉਹ ਝੂਠਾ ਅਤੇ ਬੇਕਾਰ ਹੈ।”
ਕੋਰੋਨਾ ਨਾਲ 1100 ਡਾਕਟਰਾਂ ਦੀ ਮੌਤ
ਗੌਰ ਕਰਨ ਲਾਇਕ ਹੈ ਕਿ ਕੋਰੋਨਾ ਤੋਂ ਦੇਸ਼ ਦੇ ਡਾਕਟਰ ਵੀ ਬਚੇ ਨਹੀਂ ਹਨ। ਇੰਡੀਅਨ ਮੈਡੀਕਲ ਐਸੋਸੀਏਸ਼ਨ ਨੇ ਅੰਕੜੇ ਜਾਰੀ ਕਰ ਕਿਹਾ ਕਿ ਲੋਕਾਂ ਦੀ ਜਾਨ ਬਚਾਉਂਦੇ-ਬਚਾਉਂਦੇ ਹੁਣ ਤੱਕ ਕਰੀਬ 1100 ਡਾਕਟਰ ਕੋਰੋਨਾ ਦੇ ਸ਼ਿਕਾਰ ਹੋ ਚੁੱਕੇ ਹਨ। ਇਹਨਾਂ ‘ਚੋਂ 420 ਡਾਕਟਰਾਂ ਦੀ ਮੌਤ ਦੂਜੀ ਲਹਿਰ ਦੌਰਾਨ ਹੋਈ ਹੈ।
