October 14, 2022
(Chandigarh)
ਡੇਰਾ ਸੱਚਾ ਸੌਦਾ ਦਾ ਮੁਖੀ ਗੁਰਮੀਤ ਰਾਮ ਰਹੀਮ ਇਸ ਵਾਰ ਦਿਵਾਲੀ ਜੇਲ੍ਹ ਤੋਂ ਬਾਹਰ ਮਨਾਏਗਾ। ਰਾਮ ਰਹੀਮ ਨੂੰ 40 ਦਿਨ ਦੀ ਪੈਰੋਲ ਮਿਲ ਗਈ ਹੈ। ਦੱਸਿਆ ਜਾ ਰਿਹਾ ਹੈ ਕਿ ਇਸ ਵਾਰ ਵੀ ਪੈਰੋਲ ਦੌਰਾਨ ਰਾਮ ਰਹੀਮ ਯੂਪੀ ਦੇ ਬਾਗਪਤ ਸਥਿਤ ਡੇਰੇ ਵਿੱਚ ਹੀ ਰਹੇਗਾ। ਉਸ ਹੈਲੀਕਾਪਟਰ ਤੋਂ ਬਾਗਪਤ ਦੇ ਡੇਰੇ ‘ਚ ਪਹੁੰਚੇਗਾ।
ਜਾਣਕਾਰੀ ਇਹ ਵੀ ਮਿਲ ਰਹੀ ਹੈ ਕਿ ਬਾਗਪਤ ਡੇਰੇ ਵਿੱਚ ਇਸ ਵਾਰ ਕਈ ਤਰ੍ਹਾਂ ਦੀਆਂ ਵਿਸ਼ੇਸ਼ ਤਿਆਰੀਆਂ ਕੀਤੀਆਂ ਗਈਆਂ ਹਨ। ਇੰਟਰਨੈੱਟ ਵੀ ਤੇਜ਼ ਸਪੀਡ ਦਾ ਲਗਾਇਆ ਗਿਆ ਹੈ। ਜ਼ਿਕਰੇਖਾਸ ਹੈ ਕਿ ਰਾਮ ਰਹੀਮ ਪੈਰੋਲ ਦੌਰਾਨ ਇੰਟਰਨੈੱਟ ‘ਤੇ ਲਾਈਵ ਹੋ ਕੇ ਡੇਰਾ ਪ੍ਰੇਮੀਆਂ ਨਾਲ ਰੁਬਰੂ ਹੁੰਦਾ ਹੈ।
ਪਰਿਵਾਰ ਨੇ ਲਗਾਈ ਸੀ ਪੈਰੋਲ ਦੀ ਅਰਜ਼ੀ
ਦੱਸ ਦਈਏ ਕਿ 2 ਦਿਨ ਪਹਿਲਾਂ ਹੀ ਜੇਲ੍ਹ ਮੰਤਰੀ ਰਣਜੀਤ ਸਿੰਘ ਨੇ ਕਿਹਾ ਸੀ ਕਿ ਡੇਰਾ ਮੁਖੀ ਦੇ ਪਰਿਵਾਰ ਨੇ ਉਸਦੀ ਪੈਰੋਲ ਦੀ ਅਰਜ਼ੀ ਲਗਾਈ ਹੈ। ਉਹਨਾਂ ਕਿਹਾ ਸੀ ਕਿ ਪੈਰੋਲ ਨੂੰ ਲੈ ਕੇ ਜੇਲ੍ਹ ਦਾ ਆਪਣਾ ਸਿਸਟਮ ਹੁੰਦਾ ਹੈ। ਜੇਲ੍ਹ ਵਿੱਚ ਸਜ਼ਾ ਕੱਟ ਰਹੇ ਕਿਸੇ ਵੀ ਕੈਦੀ ਦੇ ਪਰਿਵਾਰ ਵਾਲੇ ਪੈਰੋਲ ਦੀ ਅਰਜ਼ੀ ਲਗਾ ਸਕਦੇ ਹਨ। ਇਹ ਉਹਨਾਂ ਦਾ ਅਧਿਕਾਰ ਹੈ। ਪੈਰੋਲ ਦੀ ਅਰਜ਼ੀ ਵਿੱਚ ਪਰਿਵਾਰਕ ਮੈਂਬਰ ਬਕਾਇਦਾ ਇਹ ਦੱਸਦੇ ਹਨ ਕਿ ਪੈਰੋਲ ਦੌਰਾਨ ਜੇਲ੍ਹ ‘ਚ ਬੰਦ ਕੈਦੀ ਕਿਥੇ ਰਹੇਗਾ। ਕਮਿਸ਼ਨਰ ਜਿਥੇ ਦੀ ਇਜਾਜ਼ਤ ਦੇਣਗੇ, ਉਥੇ ਹੀ ਜਾਣਾ ਹੁੰਦਾ ਹੈ।
ਜੇਲ੍ਹ ਮੰਤਰੀ ਦੇ ਇਸ ਬਿਆਨ ਤੋਂ ਕਿਆਸ ਲਗਾਏ ਜਾ ਰਹੇ ਸਨ ਕਿ ਰਾਮ ਰਹੀਮ ਨੂੰ ਪੈਰੋਲ ਮਿਲਣ ਦੇ ਪੂਰੇ ਅਸਾਰ ਹਨ। ਤੇ ਹੁਣ ਰਾਮ ਰਹੀਮ ਨੂੰ ਪੈਰੋਲ ਮਿਲ ਚੁੱਕੀ ਹੈ। ਯਾਨੀ ਉਹ ਆਪਣੀ ਦਿਵਾਲੀ ਜੇਲ੍ਹ ਤੋਂ ਬਾਹਰ ਹੀ ਮਨਾਏਗਾ।
