ਬਿਓਰੋ। ਦੇਸ਼ ‘ਚ ਕੋਰੋਨਾ ਨਾਲ ਲਗਾਤਾਰ ਵਿਗੜ ਰਹੇ ਹਾਲਾਤ ‘ਤੇ ਪੀਐੱਮ ਮੋਦੀ ਨੇ ਸ਼ੁੱਕਰਵਾਰ ਨੂੰ ਲਗਾਤਾਰ 3 ਬੈਠਕਾਂ ਕੀਤੀਆਂ। ਇਹਨਾਂ ‘ਚੋਂ ਇੱਕ ਬੈਠਕ ਕੋਰੋਨਾ ਨਾਲ ਸਭ ਤੋਂ ਵੱਧ ਪ੍ਰਭਾਵਿਤ 10 ਸੂਬਿਆਂ ਦੇ ਮੁੱਖ ਮੰਤਰੀਆਂ ਨਾਲ ਹੋਈ, ਜਿਸ ‘ਚ ਦਿੱਲੀ ਦੇ ਸੀਐੱਮ ਅਰਵਿੰਦ ਕੇਜਰੀਵਾਲ ਵੀ ਸ਼ਾਮਲ ਹੋਏ। ਪਰ ਇਸ ਮੀਟਿੰਗ ‘ਚ ਇੱਕ ਅਜੀਬ ਵਾਕਿਆ ਸਾਹਮਣੇ ਆਇਆ।
ਦਰਅਸਲ, ਦਿੱਲੀ ਦੇ ਸੀਐੱਮ ਅਰਵਿੰਦ ਕੇਜਰੀਵਾਲ ਵੱਲੋਂ ਇਸ ਮੀਟਿੰਗ ‘ਚ ਆਪਣੇ ਬਿਆਨ ਦਾ ਲਾਈਵ ਟੈਲੀਕਾਸਟ ਕਰਵਾਇਆ ਗਿਆ। ਜ਼ਾਹਿਰ ਜਿਹੀ ਗੱਲ ਹੈ ਕਿ ਲਾਈਵ ਵੀਡੀਓ ਸਾਰੇ ਚੈਨਲਾਂ ‘ਤੇ ਚੱਲਣਾ ਵੀ ਸ਼ੁਰੂ ਹੋ ਗਿਆ। ਪਰ ਜਿਵੇਂ ਹੀ ਇਸਦੀ ਭਣਕ ਪੀਐੱਮ ਮੋਦੀ ਨੂੰ ਪਈ, ਤਾਂ ਉਹਨਾਂ ਕੇਜਰੀਵਾਲ ਨੂੰ ਵਿਚਾਲੇ ਹੀ ਟੋਕ ਕੇ ਪ੍ਰੋਟੋਕਾਲ ਦੀ ਪਾਲਣਾ ਕਰਨ ਦੀ ਨਸੀਹਤ ਦੇ ਦਿੱਤੀ।
ਪੀਐੱਮ ਨੇ ਟੋਕਿਆ, ਤਾਂ ਉੱਡੇ ਹੋਸ਼
ਪ੍ਰਧਾਨ ਮੰਤਰੀ ਨੇ ਕਿਹਾ, “ਇੱਕ ਗੱਲ ਮੈਂ ਕਹਿਣਾ ਚਾਹਾਂਗਾ ਕਿ ਇਹ ਸਾਡੀ ਜੋ ਪਰੰਪਰਾ ਹੈ, ਸਾਡਾ ਜੋ ਪ੍ਰੋਟੋਕਾਲ ਹੈ, ਉਸਦੇ ਖਿਲਾਫ਼ ਹੋ ਰਿਹਾ ਹੈ। ਕੋਈ ਵੀ ਮੁੱਖ ਮੰਤਰੀ ਅਜਿਹੀ ਇਨ ਹਾਊਸ ਮੀਟਿੰਗ ਨੂੰ ਲਾਈਵ ਟੈਲੀਕਾਸਟ ਕਰੇ, ਇਹ ਉਚਿਤ ਨਹੀਂ ਹੈ। ਸਾਨੂੰ ਹਮੇਸ਼ਾ ਨਿਯਮ ਦੀ ਪਾਲਣਾ ਕਰਨੀ ਚਾਹੀਦੀ ਹੈ।” ਪੀਐੱਮ ਦੇ ਇੰਨਾ ਕਹਿਣ ਦੀ ਦੇਰ ਸੀ ਕਿ ਕੇਜਰੀਵਾਲ ਦੀ ਅਵਾਜ਼ ਲੜਖੜਾਉਣ ਲੱਗ ਪਈ ਅਤੇ ਉਹਨਾਂ ਨੂੰ ਹੱਥਾਂ-ਪੈਰਾਂ ਦੀ ਪੈ ਗਈ।
ਹੱਥ ਬੰਨ੍ਹ ਕੇ ਮੰਗਣੀ ਪਈ ਮੁਆਫ਼ੀ
ਬੱਸ ਫਿਰ ਕੀ ਸੀ, ਕੇਜਰੀਵਾਲ ਨੂੰ ਹੱਥ ਬੰਨ੍ਹ ਕੇ ਮੋਦੀ ਤੋਂ ਮੁਆਫ਼ੀ ਮੰਗਣੀ ਪਈ। ਕੇਜਰੀਵਾਲ ਨੇ ਕਿਹਾ, “ਠੀਕ ਹੈ ਸਰ, ਇਸਦਾ ਧਿਆਨ ਰੱਖਾਂਗੇ ਅੱਗੇ ਤੋਂ। ਸਰ ਸਾਰੀਆਂ ਆਤਮਾਵਾਂ ਨੂੰ ਸ਼ਾਂਤੀ ਮਿਲੇ। ਜਿਹਨਾਂ-ਜਿਹਨਾਂ ਲੋਕਾਂ ਦਾ ਇਸ ਦੌਰਾਨ ਕੋਰੋਨਾ ਕਰਕੇ ਦੇਹਾਂਤ ਹੋ ਗਿਆ, ਉਹਨਾਂ ਦੇ ਪਰਿਵਾਰ ਨੂੰ ਦੁੱਖ ਸਹਿਣ ਦੀ ਸ਼ਾਂਤੀ ਮਿਲੇ। ਜੇਕਰ ਸਰ ਮੇਰੇ ਤੋਂ ਕੋਈ ਗੁਸਤਾਖੀ ਹੋਈ ਹੈ..ਮੈਂ ਕੁਝ ਕਠੋਰ ਬੋਲ ਦਿੱਤਾ..ਮੇਰੇ ਵਤੀਰੇ ‘ਚ ਕੋਈ ਗਲਤੀ ਹੋਈ ਹੈ..ਗੁਸਤਾਖੀ ਹੋਈ ਹੈ, ਤਾਂ ਮੈਂ ਉਸਦੇ ਲਈ ਮੁਆਫ਼ੀ ਚਾਹੁੰਦਾ ਹਾਂ। ਹਾਲੇ ਤੱਕ ਜਿੰਨੇ ਪ੍ਰੇਜ਼ੇਂਟੇਸ਼ਨ ਹੋਏ, ਉਹ ਚੰਗੇ ਸਨ। ਜੋ ਤੁਸੀਂ ਸਾਨੂੰ ਨਿਰਦੇਸ਼ ਦਿੱਤੇ ਹਨ, ਅਸੀਂ ਉਹਨਾਂ ਦੀ ਪਾਲਣਾ ਕਰਾਂਗੇ।”
