ਚੰਡੀਗੜ੍ਹ। ਪੰਜਾਬ ਕਾਂਗਰਸ ਦੀ ਕਮਾਨ ਸੰਭਾਲਣ ਤੋਂ ਕਰੀਬ ਇੱਕ ਮਹੀਨੇ ਬਾਅਦ ਨਵਜੋਤ ਸਿੰਘ ਸਿੱਧੂ ਨੇ ਆਪਣੇ 4 ਸਲਾਹਕਾਰਾਂ ਦੀ ਟੀਮ ਤਿਆਰ ਕੀਤੀ ਹੈ। ਸਿੱਧੂ ਦੇ ਸਲਾਹਕਾਰਾਂ ‘ਚ ਲੋਕ ਸਭਾ ਸਾਂਸਦ ਡਾ. ਅਮਰ ਸਿੰਘ, ਪੰਜਾਬ ਦੇ ਸਾਬਕਾ DGP ਮੁਹੰਮਦ ਮੁਸਤਫਾ, ਮਾਲਵਿੰਦਰ ਸਿੰਘ ਮਾਲੀ ਅਤੇ ਡਾ. ਪਿਆਰੇ ਲਾਲ ਗਰਗ ਦੇ ਨਾਂਅ ਸ਼ਾਮਲ ਹਨ।
— Navjot Singh Sidhu (@sherryontopp) August 11, 2021
ਮੁਹੰਮਦ ਮੁਸਤਫਾ
ਕਦੇ ਕੈਪਟਨ ਦੇ ਕਰੀਬੀ, ਅੱਜ ਸਿੱਧੂ ਦੇ ਖਾਸ
ਸਿੱਧੂ ਦੇ ਸਲਾਹਕਾਰਾਂ ਦੀ ਟੀਮ ‘ਚ ਸਭ ਤੋਂ ਅਹਿਮ ਨਾਂਅ ਹੈ ਸਾਬਕਾ DGP ਮੁਹੰਮਦ ਮੁਸਤਫਾ ਦਾ। ਮੁਸਤਫਾ ਦੀ ਗਿਣਤੀ ਕਦੇ ਸੀਐੱਮ ਕੈਪਟਨ ਅਮਰਿੰਦਰ ਸਿੰਘ ਦੇ ਕਰੀਬੀ ਅਫਸਰਾਂ ‘ਚ ਹੁੰਦੀ ਸੀ। 2017 ਤੋਂ ਪਹਿਲਾਂ ਮੁਸਤਫਾ ਨੂੰ ਲੱਗਦਾ ਸੀ ਕਿ ਕੈਪਟਨ ਅਮਰਿੰਦਰ ਸਿੰਘ ਦੀ ਸਰਕਾਰ ਬਣੀ, ਤਾਂ ਉਹਨਾਂ ਨੂੰ DGP ਲਾਇਆ ਜਾਵੇਗਾ ਪਰ ਅਜਿਹਾ ਨਹੀਂ ਹੋਇਆ।
ਕੈਪਟਨ ਅਮਰਿੰਦਰ ਸਿੰਘ ਦੀ ਸਰਕਾਰ ਬਣੀ, ਤਾਂ ਉਹਨਾਂ ਨੇ ਪੁਰਾਣੇ DGP ਸੁਰੇਸ਼ ਅਰੋੜਾ ਨੂੰ ਹੀ DGP ਦੇ ਅਹੁਦੇ ‘ਤੇ ਬਣੇ ਰਹਿਣ ਦਿੱਤਾ। ਜਦੋਂ ਸੁਰੇਸ਼ ਅਰੋੜਾ ਰਿਟਾਇਰ ਹੋ ਗਏ, ਤਾਂ ਉਹਨਾਂ ਦੀ ਥਾਂ ਸੀਐੱਮ ਕੈਪਟਨ ਅਮਰਿੰਦਰ ਸਿੰਘ ਨੇ ਦਿਨਕਰ ਗੁਪਤਾ ਨੂੰ DGP ਦਾ ਕਾਰਜਭਾਰ ਸੌਂਪ ਦਿੱਤਾ, ਜਿਹਨਾਂ ਦਾ ਤਜ਼ਰਬਾ ਮੁਹੰਮਦ ਮੁਸਤਫਾ ਤੋਂ ਬੇਹੱਦ ਘੱਟ ਸੀ। ਬੱਸ ਇਸੇ ਗੱਲ ‘ਤੇ ਦੋਵਾਂ ਦੇ ਰਿਸ਼ਤੇ ਵਿਗੜ ਗਏ। ਹਾਲਾਂਕਿ ਮੁਸਤਫਾ ਦੀ ਪਤਨੀ ਰਜਿਆ ਸੁਲਤਾਨਾ ਕੈਪਟਨ ਦੀ ਕੈਬਨਿਟ ‘ਚ ਮੰਤਰੀ ਹਨ। ਰਜਿਆ ਸੁਲਤਾਨਾ ਦੀ ਗਿਣਤੀ ਵੀ ਕੈਪਟਨ ਦੇ ਵਿਰੋਧੀਆਂ ‘ਚ ਹੁੰਦੀ ਹੈ।
ਡਾ. ਅਮਰ ਸਿੰਘ
ਕਦੇ ਸਿੱਧੂ ਨੇ OSD ਦੇ ਅਹੁਦੇ ਤੋਂ ਹਟਾਇਆ ਸੀ
ਸਿੱਧੂ ਦੀ ਸਲਾਹਕਾਰੀ ਮੰਡਲੀ ‘ਚ ਫਤਿਹਗੜ੍ਹ ਸਾਹਿਬ ਤੋਂ ਲੋਕ ਸਭਾ ਸਾਂਸਦ ਅਮਰ ਸਿੰਘ ਵੀ ਹਨ, ਜੋ ਕਦੇ ਨਵਜੋਤ ਸਿੰਘ ਸਿੱਧੂ ਦੇ ਮੰਤਰੀ ਰਹਿੰਦੇ ਹੋਏ ਉਹਨਾਂ ਦੇ OSD ਦੇ ਤੌਰ ‘ਤੇ ਨਿਯੁਕਤ ਕੀਤੇ ਗਏ ਸਨ ਅਤੇ ਬਾਅਦ ‘ਚ ਉਹਨਾਂ ਨੂੰ OSD ਦੇ ਅਹੁਦੇ ਤੋਂ ਹਟਾ ਦਿੱਤਾ ਗਿਆ ਸੀ।
ਮਾਲਵਿੰਦਰ ਮਾਲੀ
ਕੈਪਟਨ, ਬਾਦਲ ਸਭ ਦੇ ਕਰੀਬੀ ਰਹੇ
ਮਾਲਵਿੰਦਰ ਮਾਲੀ ਦੀ ਗੱਲ ਕੀਤੀ ਜਾਵੇ, ਤਾਂ ਉਹ ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਦੇ ਸਾਬਕਾ ਪ੍ਰਧਾਨ ਜਥੇਦਾਰ ਗੁਰਚਰਨ ਸਿੰਘ ਟੋਹੜਾ ਦੇ ਮੀਡੀਆ ਸਲਾਹਕਾਰ ਰਹਿ ਚੁੱਕੇ ਹਨ। ਮਾਲੀ ਨੇ ਪਿਛਲੀ ਕੈਪਟਨ ਸਰਕਾਰ ‘ਚ CMO ‘ਚ ਕੰਮ ਕੀਤਾ ਸੀ। ਬਾਦਲ ਸਰਕਾਰ ਸਮੇਂ ਉਹ ਹਰਚਰਨ ਸਿੰਘ ਬੈਂਸ ਲਈ ਕੰਮ ਕਰਦੇ ਰਹੇ, ਪਰ ਹੁਣ ਮਾਲਵਿੰਦਰ ਮਾਲੀ ਵੱਖ-ਵੱਖ ਮੁੱਦਿਆਂ ‘ਤੇ ਨਵਜੋਤ ਸਿੰਘ ਸਿੱਧੂ ਨੂੰ ਸਲਾਹ ਦੇਣਗੇ।
ਮਾਲਵਿੰਦਰ ਮਾਲੀ ਕਾਫੀ ਸਮੇਂ ਤੋਂ ਪੰਜਾਬ ਨਾਲ ਜੁੜੇ ਮੁੱਦਿਆਂ ਨੂੰ ਸੋਸ਼ਲ ਮੀਡੀਆ ‘ਤੇ ਉਜਾਗਰ ਕਰਨ ਦਾ ਕੰਮ ਕਰ ਰਹੇ ਹਨ। ਕਿਸਾਨ ਅੰਦੋਲਨ ਨੂੰ ਲੈ ਕੇ ਉਹਨਾਂ ਦੀ ਆਪਣੀ ਵੱਖਰੀ ਰਾਏ ਹੈ। ਨਵਜੋਤ ਸਿੰਘ ਸਿੱਧੂ ਨੂੰ ਪ੍ਰਧਾਨ ਬਣਾਏ ਜਾਣ ਦੇ ਬਾਅਦ ਤੋਂ ਮਾਲਵਿੰਦਰ ਮਾਲੀ ਉਹਨਾਂ ਦੇ ਪੱਖ ‘ਚ ਹੀ ਬੋਲਦੇ ਨਜ਼ਰ ਆਏ ਹਨ।
ਇੱਕ ਪਾਸੇ ਮੁਹੰਮਦ ਮੁਸਤਫਾ ‘ਤੇ ਦਹਿਸ਼ਤਵਾਦ ਦੇ ਦੌਰ ‘ਚ ਸਿੱਖ ਨੌਜਵਾਨਾਂ ਨੂੰ ਮਾਰਨ ਦੇ ਇਲਜਾਮ ਲੱਗਦੇ ਰਹੇ ਹਨ, ਤਾਂ ਦੂਜੇ ਪਾਸੇ ਮਾਲਵਿੰਦਰ ਮਾਲੀ ਇਹਨਾਂ ਹੀ ਨੌਜਵਾਨਾਂ ਦੇ ਮਨੁੱਖੀ ਅਧਿਕਾਰ ਦੇ ਮਾਮਲੇ ਚੁੱਕਦੇ ਰਹੇ ਹਨ। ਇਹ ਦੋਵੇਂ ਇਕੱਠੇ ਕੰਮ ਕਿਵੇਂ ਕਰਨਗੇ, ਇਹ ਵੀ ਵੇਖਣਾ ਹੋਵੇਗਾ।
ਪਿਆਰੇ ਲਾਲ ਗਰਗ
ਸਿੱਖਿਆ ਮਾਹਰ ਅਤੇ ਸਮਾਜਸੇਵੀ
ਡਾ. ਪਿਆਰੇ ਲਾਲ ਗਰਗ ਨੂੰ ਵੀ ਨਵਜੋਤ ਸਿੰਘ ਸਿੱਧੂ ਨੇ ਆਪਣਾ ਸਲਾਹਕਾਰ ਨਿਯੁਕਤ ਕੀਤਾ ਹੈ। ਡਾ. ਪਿਆਰੇ ਲਾਲ ਗਰਗ ਦੀ ਗੱਲ ਕੀਤੀ ਜਾਵੇ, ਤਾਂ ਉਹ ਬਾਬਾ ਫਰੀਦ ਯੂਨੀਵਰਸਿਟੀ ਆਫ ਮੈਡੀਕਲ ਸਾਇੰਸਿਸ ਦੇ ਸਾਬਕਾ ਰਜਿਸਟਰਾਰ ਅਚਤੇ ਸੋਸ਼ਲ ਐਕਟੀਵਿਸਟ ਵੀ ਰਹੇ ਹਨ। ਉਹ ਕਈ ਸਾਲਾਂ ਤੋਂ ਚੋਣਾਂ ‘ਚ ਸੁਧਾਰ ਦੀ ਮੁਹਿੰਮ ਚਲਾ ਰਹੇ ਹਨ।
ਗਰਗ ਅੱਜਕੱਲ੍ਹ ‘ਪਿੰਡ ਬਚਾਓ, ਪੰਜਾਬ ਬਚਾਓ’ ਕੈਂਪੇਨ ਲਈ ਕੰਮ ਕਰ ਰਹੇ ਹਨ। ਉਹ ਸਮਾਜਿਕ ਮੁੱਦਿਆਂ ‘ਤੇ ਬੇਬਾਕੀ ਨਾਲ ਆਪਣੀ ਰਾਏ ਰੱਖਦੇ ਹਨ। ਵਿਧਾਨ ਸਭਾ ਚੋਣਾਂ ਦੇ ਮੁੱਦੇ ‘ਤੇ ਸਮਾਜ ਦੇ ਵੱਖ-ਵੱਖ ਵਰਗਾਂ ਨਾਲ ਡਿਬੇਟ ਕਰਕੇ ਸਮਾਜ ਨੂੰ ਜਾਗਰੂਕ ਕਰਨ ਦਾ ਕੰਮ ਵੀ ਕਰਦੇ ਹਨ।
ਸਲਾਹਕਾਰਾਂ ਦੇ ਜ਼ਰੀਏ ਕੈਪਟਨ ਨੂੰ ਚੁਣੌਤੀ!
ਪੰਜਾਬ ਕਾਂਗਰਸ ਦੇ ਇਤਿਹਾਸ ‘ਚ ਪਹਿਲੀ ਵਾਰ ਕਿਸੇ ਪ੍ਰਧਾਨ ਨੇ ਇਸ ਤਰ੍ਹਾਂ ਆਪਣੇ 4 ਸਲਾਹਕਾਰ ਨਿਯੁਕਤ ਕਤੇ ਹਨ। ਸਿੱਧੂ ਦੇ ਇਸ ਫੈਸਲੇ ਨੂੰ ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਲਈ ਇੱਕ ਚੁਣੌਤੀ ਦੇ ਰੂਪ ‘ਚ ਵੇਖਿਆ ਜਾ ਰਿਹਾ ਹੈ, ਕਿਉੰਕਿ ਅੱਜ ਤੱਕ ਕਾਂਗਰਸ ਨੇ ਕਦੇ ਇਸ ਤਰ੍ਹਾਂ ਦੇ ਸਲਾਹਕਾਰਾਂ ਦੀ ਨਿਯੁਕਤੀ ਨਹੀਂ ਕੀਤੀ। ਹੁਣ ਸਵਾਲ ਇਹ ਖੜ੍ਹਾ ਹੁੰਦਾ ਹੈ..ਕੀ ਸਿੱਧੂ ਕੈਪਟਨ ਸਰਕਾਰ ਦੇ ਖਿਲਾਫ਼ ਇੱਕ ਬਰਾਬਰ ਸਰਕਾਰ ਚਲਾਉਣਾ ਚਾਹ ਰਹੇ ਹਨ।
