ਚੰਡੀਗੜ੍ਹ। ਪੰਜਾਬ ਦੇ ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਦੀ ਸਰਕਾਰੀ ਰਿਹਾਇਸ਼ ਦੇ ਬਾਹਰ ਸੂਬੇ ਦੇ ਪੈਰਾ ਖਿਡਾਰੀਆਂ ਨੇ ਰੁਜ਼ਗਾਰ ਦੀ ਮੰਗ ਨੂੰ ਲੈ ਕੇ ਜ਼ੋਰਦਾਰ ਪ੍ਰਦਰਸ਼ਨ ਕੀਤਾ। ਇਹ ਖਿਡਾਰੀ ਆਪਣੇ ਮੈਡਲ ਅਤੇ ਟਰਾਫੀਆਂ ਲੈ ਕੇ ਇਥੇ ਪਹੁੰਚੇ ਸਨ ਅਤੇ ਨੌਕਰੀ ਨਾ ਮਿਲਣ ਦੇ ਵਿਰੋਧ ‘ਚ ਸਰਕਾਰ ਨੂੰ ਵਾਪਸ ਦੇਣਾ ਚਾਹੁੰਦੇ ਸਨ।
ਖਿਡਾਰੀਆਂ ਦਾ ਕਹਿਣਾ ਹੈ ਕਿ ਇਹਨਾਂ ਨੇ ਦੇਸ਼ਾਂ-ਵਿਦੇਸ਼ਾਂ ‘ਚ ਪੰਜਾਬ ਦਾ ਨਾੰਅ ਰੋਸ਼ਨ ਕੀਤਾ, ਪਰ ਉਹਨਾਂ ਨੂੰ ਸਰਕਾਰ ਵੱਲੋਂ ਕੀਤੇ ਵਾਅਦੇ ਦੇ ਬਾਵਜੂਦ ਕੋਈ ਨੌਕਰੀ ਨਹੀਂ ਦਿੱਤੀ ਗਈ।
ਪ੍ਰਦਰਸ਼ਨ ਕਰ ਰਹੇ ਪੈਰਾ ਖਿਡਾਰੀਆਂ ਨੇ ਜਦੋਂ ਬੈਰੀਕੇਡ ਤੋੜ ਕੇ ਅੱਗੇ ਵਧਣ ਦੀ ਕੋਸ਼ਿਸ਼ ਕੀਤੀ, ਤਾਂ ਇਹਨਾਂ ਦੀ ਪੁਲਿਸ ਨਾਲ ਝੜਪ ਹੋ ਗਈ। ਕਈ ਖਿਡਾਰੀ ਸੜਕ ‘ਤੇ ਹੀ ਬਹਿ ਗਏ।
ਇਸ ਦੌਰਾਨ ਕੁਝ ਪੈਰਾ ਅਥਲੀਟਾਂ ਨਾਲ ਪੁਲਿਸ ਵੱਲੋਂ ਬਦਸਲੂਕੀ ਵੀ ਕੀਤੀ ਗਈ। ਕੁਝ ਦੇਰ ਦੇ ਹੰਗਾਮੇ ਤੋਂ ਬਾਅਦ ਪੁਲਿਸ ਨੇ ਇਹਨਾਂ ਸਾਰਿਆਂ ਨੂੰ ਹਿਰਾਸਤ ‘ਚ ਲੈ ਲਿਆ।
AAP ਵੀ ਹੋਈ ਪ੍ਰਦਰਸ਼ਨ ‘ਚ ਸ਼ਾਮਲ
ਆਮ ਆਦਮੀ ਪਾਰਟੀ ਦੇ ਯੂਥ ਵਿੰਗ ਵੱਲੋਂ ਵੀ ਇਸ ਪ੍ਰਦਰਸ਼ਨ ‘ਚ ਸ਼ਮੂਲੀਅਤ ਕਰਦਿਆਂ ਪੈਰਾ ਅਥਲੀਟਾਂ ਨੂੰ ਸਮਰਥਨ ਦਿੱਤਾ ਗਿਆ। ‘ਆਪ’ ਨੇ ਸੂਬੇ ਦੇ ਮੁੱਖ ਮੰਤਰੀ ‘ਤੇ ਸਿੱਧਾ ਹਮਲਾ ਬੋਲਦਿਆਂ ਕਿਹਾ, “ਰਾਜਾ ਅਮਰਿੰਦਰ ਸਿੰਘ ਨੂੰ ਸਿਰਫ ਆਪਣੇ ਵਿਧਾਇਕਾਂ ਅਤੇ ਮੰਤਰੀਆਂ ਦੇ ਪੁੱਤਰਾਂ ਦੀ ਫਿਕਰ ਹੈ, ਜਿਸਦੇ ਚਲਦੇ ਉਹਨਾਂ ਨੂੰ ਹਾਈ ਪ੍ਰੋਫਾਈਲ ਨੌਕਰੀਆਂ ਦਿੱਤੀਆਂ ਜਾ ਰਹੀਆਂ ਹਨ। ਸੀਐੱਮ ਨੇ ‘ਪੰਜਾਬ ਦੇ ਖਿਡਾਰੀ’ ਦੀ ਕੀਮਤ ਨਹੀ ਜਾਣੀ, ਖਿਡਾਰੀ ਦੁਖੀ ਹੋ ਰਹੇ ਹਨ ਅਤੇ ਉਹਨਾਂ ਨੂੰ ਕੈਪਟਨ ਵੱਲੋਂ ਕੀਤੇ ਵਾਅਦਿਆਂ ਦੇ ਉਲਟ ਕੋਈ ਨੌਕਰੀ ਨਹੀਂ ਦਿੱਤੀ ਗਈ।” ‘ਆਪ’ ਨੇ ਕਿਹਾ ਕਿ ਅਜਿਹੇ ਤਾਨਸ਼ਾਹ ਮੁੱਖ ਮੰਤਰੀ ਨੂੰ ਅਸੀਂ ਬਰਦਾਸ਼ਤ ਨਹੀਂ ਕਰਾਂਗੇ ਅਤੇ ਦਾਅਵਾ ਕੀਤਾ ਕਿ ਅਗਾਮੀ ਚੋਣਾਂ ‘ਚ ਪੰਜਾਬ ਦੇ ਖਿਡਾਰੀ ਉਹਨਾਂ ਨੂੰ ਲਾਂਭੇ ਕਰਨਗੇ।
AAP will not tolerate such dictatorial a Chief Minister and his negligence towards the issues of sports players. Punjab De Khidari are ready to eradicate @INCIndia upcoming 2022 elections.
[4/4] pic.twitter.com/GY2eHN4MEE
— AAP Punjab (@AAPPunjab) June 24, 2021
CM ਨੇ ਖਿਡਾਰੀਆਂ ਤੋਂ ਮੰਗੀ ਮੁਆਫ਼ੀ
ਇਸ ਪੂਰੇ ਘਟਨਾਕ੍ਰਮ ਤੋਂ ਬਾਅਦ ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਨੇ ਖੁਦ ਵੀਡੀਓ ਕਾਲ ਦੇ ਜ਼ਰੀਏ ਪੈਰਾ ਅਥਲੀਟਾਂ ਨਾਲ ਗੱਲਬਾਤ ਕੀਤੀ। ਸੀਐੱਮ ਨੇ ਕਿਹਾ ਕਿ ਉਹਨਾਂ ਵੱਲੋਂ ਖੇਡ ਵਿਭਾਗ ਨੂੰ ਪੈਰਾ ਅਥਲੀਟਾਂ ਲਈ ਪਾਲਿਸੀ ਲਿਆਉਣ ਲਈ ਕਹਿ ਦਿਤਾ ਗਿਆ ਹੈ, ਜੋ ਅਗਲੀ ਕੈਬਨਿਟ ‘ਚ ਪਾਸ ਕਰ ਦਿੱਤੀ ਜਾਵੇਗੀ। ਇਸਦੇ ਨਾਲ ਹੀ ਉਹਨਾਂ ਨੇ ਪੁਲਿਸ ਵੱਲੋਂ ਪ੍ਰਦਰਸ਼ਨਕਾਰੀ ਪੈਰਾ ਖਿਡਾਰੀਆਂ ਨਾਲ ਕੀਤੇ ਵਰਤਾਰੇ ਦੀ ਵੀ ਨਿੰਦਾ ਕੀਤੀ ਅਤੇ ਕਿਹਾ ਕਿ ਉਹ ਇਸ ‘ਤੇ ਢੁਕਵਾਂ ਐਕਸ਼ਨ ਲੈਣਗੇ।
Have asked the Sports Department to bring a policy before the Council of Ministers for providing employment to para sportspersons who have brought laurels to our State and country. Our Government is fully committed for the welfare of our sportspersons. pic.twitter.com/1KC9ci59yp
— Capt.Amarinder Singh (@capt_amarinder) June 24, 2021
ਖਿਡਾਰੀਆਂ ਨਾਲ ਗੱਲਬਾਤ ਦੀ ਵੀਡੀਓ ਟਵੀਟ ਕਰਦੇ ਹੋਏ ਮੁੱਖ ਮੰਤਰੀ ਨੇ ਲਿਖਿਆ, “ਸਾਡੇ ਸੂਬੇ ਅਤੇ ਦੇਸ਼ ਨੂੰ ਮਾਣ ਮਹਿਸੂਸ ਕਰਵਾਉਣ ਵਾਲੇ ਪੈਰਾ ਖਿਡਾਰੀਆਂ ਨੂੰ ਰੁਜ਼ਗਾਰ ਮੁਹੱਈਆ ਕਰਵਾਉਣ ਦੇ ਮੰਤਵ ਨਾਲ ਖੇਡ ਵਿਭਾਗ ਨੂੰ ਪਾਲਿਸੀ ਲਿਆਉਣ ਲਈ ਕਹਿ ਦਿੱਤਾ ਗਿਆ ਹੈ। ਸਾਡੀ ਸਰਕਾਰ ਸਾਡੇ ਖਿਡਾਰੀਆਂ ਦੇ ਹਿੱਤ ਲਈ ਪੂਰੀ ਤਰ੍ਹਾਂ ਸਮਰਪਿਤ ਹੈ।”
