ਚੰਡੀਗੜ੍ਹ। ਪੰਜਾਬ ‘ਚ ਅਗਾਮੀ ਵਿਧਾਨ ਸਭਾ ਚੋਣਾਂ ਨੂੰ ਲੈ ਕੇ ਸਿਆਸੀ ਸਰਗਰਮੀਆਂ ਪੂਰੇ ਸਿਖਰਾਂ ‘ਤੇ ਹਨ ਤੇ ਸਿਆਸੀ ਜੋੜ-ਤੋੜ ਦੀਆਂ ਕੋਸ਼ਿਸ਼ਾਂ ਨੇ ਵੀ ਜ਼ੋਰ ਫੜ ਲਿਆ ਹੈ। ਇਸ ਸਭ ਦੇ ਵਿਚਾਲੇ ਸੂਬੇ ‘ਚ ਇੱਕ ਗਠਜੋੜ ਦੀ ਚਰਚਾ ਨੇ ਇਹਨੀਂ ਦਿਨੀਂ ਖੂਬ ਜ਼ੋਰ ਫੜਿਆ ਹੋਇਆ ਹੈ। ਇਹ ਸੰਭਾਵੀ ਗਠਜੋੜ ਹੈ- ਸ਼੍ਰੋਮਣੀ ਅਕਾਲੀ ਦਲ ਅਤੇ ਬਹੁਜਨ ਸਮਾਜ ਪਾਰਟੀ ਦਾ।
ਚਰਚਾ ਹੈ ਕਿ ਅਕਾਲੀ ਦਲ ਦੇ ਪ੍ਰਧਾਨ ਸੁਖਬੀਰ ਬਾਦਲ ਅਤੇ ਬੀਐਸਪੀ ਲੀਡਰਸ਼ਿਪ ਵਿਚਾਲੇ ਗਠਜੋੜ ਦੀਆਂ ਕੋਸ਼ਿਸ਼ਾਂ ਨੂੰ ਲੈ ਕੇ 2-3 ਮੀਟਿੰਗਾਂ ਹੋ ਚੁੱਕੀਆਂ ਹਨ। ਖੁਦ ਸੁਖਬੀਰ ਬਾਦਲ ਇਸਦੇ ਸੰਕੇਤ ਵੀ ਦੇ ਚੁੱਕੇ ਹਨ। ਨਿਊਜ਼ ਏਜੰਸੀ ANI ਨੂੰ ਦਿੱਤੇ ਇੰਟਰਵਿਊ ‘ਚ ਸੁਖਬੀਰ ਬਾਦਲ ਨੇ ਕਿਹਾ ਸੀ ਕਿ ਕਾਂਗਰਸ, ‘ਆਪ’ ਅਤੇ ਬੀਜੇਪੀ ਨੂੰ ਛੱਡ ਕੇ ਕਿਸੇ ਵੀ ਪਾਰਟੀ ਨਾਲ ਗਠਜੋੜ ਲਈ ਉਹਨਾਂ ਦੇ ਦਰਵਾਜ਼ੇ ਖੁੱਲ੍ਹੇ ਹਨ।
ਗਠਜੋੜ ਦੀ ਚਰਚਾ ਨੇ ਉਸ ਵੇਲੇ ਹੋਰ ਵੀ ਜ਼ੋਰ ਫੜ ਲਿਆ, ਜਦੋਂ BSP ਦੇ ਪੰਜਾਬ ਪ੍ਰਧਾਨ ਜਸਵੀਰ ਸਿੰਘ ਗੜ੍ਹੀ ਨੇ ਇਸ ਖ਼ਬਰ ‘ਤੇ ਮੁਹਰ ਲਗਾ ਦਿੱਤੀ ਕਿ ਉਹਨਾਂ ਦੀ ਪਾਰਟੀ ਸ਼੍ਰੋਮਣੀ ਅਕਾਲੀ ਦਲ ਨਾਲ 2-3 ਗੇੜਾਂ ਦੀਆਂ ਬੈਠਕਾਂ ਕਰ ਚੁੱਕੀ ਹੈ। ਹਾਲਾਂਕਿ ਗੜ੍ਹੀ ਨੇ ਕਿਹਾ ਕਿ ਗਠਜੋੜ ਬਾਰੇ ਕੋਈ ਵੀ ਫ਼ੈਸਲਾ BSP ਪ੍ਰਮੁੱਖ ਮਾਇਆਵਤੀ ਹੀ ਲੈਣਗੇ।
BSP ਤੋਂ ਕੀ ਫ਼ਾਇਦਾ ਚਾਹੁੰਦੇ ਹਨ ਸੁਖਬੀਰ ?
ਪੰਜਾਬ ਵਿਧਾਨ ਸਭਾ ਚੋਣਾਂ ਤੋਂ ਪਹਿਲਾਂ ਜਿਸ ਤਰ੍ਹਾਂ ਸਾਰੀਆਂ ਪਾਰਟੀਆਂ ਦਲਿਤ ਵੋਟਬੈਂਕ ਦੇ ਸਹਾਰੇ ਸੱਤਾ ਹਥਿਆਉਣ ਦੀ ਕੋਸ਼ਿਸ਼ ‘ਚ ਹਨ, ਅਕਾਲੀ ਦਲ ਵੀ ਇਸੇ ਕੋਸ਼ਿਸ਼ ‘ਚ ਹੈ। ਸੁਖਬੀਰ ਬਾਦਲ ਤਾਂ ਦਲਿਤ ਆਗੂ ਨੂੰ ਡਿਪਟੀ ਸੀਐੱਮ ਬਣਾਏ ਜਾਣ ਦਾ ਐਲਾਨ ਵੀ ਕਰ ਚੁੱਕੇ ਹਨ। ਦੋਆਬਾ ਖੇਤਰ ‘ਚ ਅਕਾਲੀ ਦਲ ਦੀ ਢਿੱਲੀ ਪਕੜ ਨੂੰ BSP ਨਾਲ ਗਠਜੋੜ ਹੀ ਮਜਬੂਤੀ ਦੇ ਸਕਦਾ ਹੈ।
ਦੱਸਣਯੋਗ ਹੈ ਕਿ ਸ਼੍ਰੋਮਣੀ ਅਕਾਲੀ ਦਲ, ਇਸ ਤੋਂ ਪਹਿਲਾਂ ਵੀ ਬੀਜੇਪੀ ਨਾਲ ਗਠਜੋੜ ‘ਚ ਚੋਣ ਲੜਦਾ ਰਿਹਾ ਹੈ। ਹਾਲਾਂਕਿ ਪਿਛਲੀਆਂ ਚੋਣਾਂ ‘ਚ ਅਕਾਲੀ ਦਲ ਨੂੰ 10 ਅਤੇ ਬੀਜੇਪੀ ਨੂੰ ਸਿਰਫ 3 ਸੀਟਾਂ ਹੀ ਮਿਲੀਆਂ ਸਨ। ਓਧਰ BSP ਵੱਖਰੇ ਤੌਰ ‘ਤੇ ਚੋਣ ਲੜਕੇ ਔਸਤਨ 5-25 ਹਜ਼ਾਰ ਵੋਟਾਂ ਆਪਣੇ ਨਾੰਅ ਕੀਤੀਆਂ। ਇਹ ਵੋਟਾਂ ਅਕਾਲੀ ਦਲ ਆਪਣੇ ਹਿੱਸੇ ਪਾਉਣ ਦੀ ਕੋਸ਼ਿਸ਼ ਕਰੇਗਾ।
ਪੰਜਾਬ ਨਾਲ BSP ਦਾ ਪੁਰਾਣਾ ਰਿਸ਼ਤਾ
1989 ‘ਚ ਬੀਐਸਪੀ ਨੂੰ ਆਪਣਾ ਪਹਿਲਾ ਸਾਂਸਦ ਪੰਜਾਬ ਤੋਂ ਹੀ ਮਿਲਿਆ। ਇਥੋਂ ਤੱਕ ਕਿ ਪਾਰਟੀ ਦੇ ਫਾਊਂਡਰ ਕਾਂਸ਼ੀ ਰਾਮ, ਜਿਹਨਾਂ ਦਾ ਜਨਮ ਪੰਜਾਬ ਦੇ ਰੋਪੜ ‘ਚ ਹੋਇਆ ਸੀ, ਉਹ 1996 ‘ਚ ਹੁਸ਼ਿਆਰਪੁਰ ਤੋਂ ਚੋਣ ਜਿੱਤ ਕੇ ਲੋਕ ਸਭਾ ਪਹੁੰਚੇ ਸਨ। ਫਿਲੌਰ ਵਿਧਾਨ ਸਭਾ ਹਲਕਾ ਇਕਲੌਤਾ ਅਜਿਹਾ ਹਲਕਾ ਹੈ, ਜਿਥੇ ਚੋਣਾਂ ‘ਚ ਮੁਕਾਬਲਾ ਚਹੁੰ-ਤਰਫਾ ਮੰਨਿਆ ਜਾਂਦਾ ਹੈ। ਫਿਲੌਰ ਹੀ ਇੱਕ ਅਜਿਹੀ ਸੀਟ ਹੈ, ਜਿਥੇ BSP 2017 ‘ਚ ਆਪਣੀ ਜ਼ਮਾਨਤ ਬਚਾਉਣ ‘ਚ ਕਾਮਯਾਬ ਹੋਈ ਸੀ।
ਇਹ ਵੀ ਪੜ੍ਹੋ:- ਮੁੱਦੇ ਓਹੀ, ਰੰਗਤ ਨਵੀਂ…ਆਖਰ ਕੌਣ ਜਿੱਤੇਗਾ 2022 ਦੀ ਬਾਜ਼ੀ ?
