ਚੰਡੀਗੜ੍ਹ। ਕਰੀਬ ਡੇਢ ਸਾਲ ਦੀ ਚੁੱਪੀ ਤੋਂ ਬਾਅਦ ਜਦੋਂ ਸਾਬਕਾ ਕੈਬਨਿਟ ਮੰਤਰੀ ਨਵਜੋਤ ਸਿੱਧੂ ਮੁੜ ਸਰਗਰਮ ਹੋਏ, ਤਾਂ ਇੱਕ ਤੋਂ ਬਾਅਦ ਇੱਕ ਹਮਲੇ ਕਰ ਆਪਣੀ ਸਰਕਾਰ ਨੂੰ ਘੇਰਨ ਲੱਗੇ। ਪਹਿਲਾਂ ਸ਼ਾਇਰੀ ਦੇ ਅੰਦਾਜ਼ ‘ਚ, ਤਾਂ ਫਿਰ ਖੁੱਲ੍ਹੇਆਮ ਉਹਨਾਂ ਨੇ ਕੈਪਟਨ ਸਰਕਾਰ ਨੂੰ ਘੇਰਿਆ। ਪਰ ਪਿਛਲੇ ਕੁਝ ਦਿਨਾਂ ਤੋਂ ਖਾਸਕਰ ਕੋਟਕਪੂਰਾ ਫ਼ਾਇਰਿੰਗ ਕੇਸ ‘ਚ ਹਾਈਕੋਰਟ ਦਾ ਆਰਡਰ ਸਾਹਮਣੇ ਆਉਣ ਤੋਂ ਬਾਅਦ ਸਿੱਧੂ ਬੇਹੱਦ ਹਮਲਾਵਰ ਹਨ ਅਤੇ ਸਿੱਧੇ ਸੀਐੱਮ ਕੈਪਟਨ ਅਮਰਿੰਦਰ ਸਿੰਘ ਨੂੰ ਨਿਸ਼ਾਨੇ ‘ਤੇ ਲੈ ਰਹੇ ਹਨ।
ਜਦੋਂ ਨਵਜੋਤ ਸਿੱਧੂ ਸਿੱਧੇ ਕੈਪਟਨ ‘ਤੇ ਹਮਲੇ ਬੋਲਣ ਲੱਗੇ ਹਨ, ਤਾਂ ਹੁਣ ਕੈਪਟਨ ਵੀ ਚੁੱਪ ਰਹਿਣ ਨੂੰ ਤਿਆਰ ਨਹੀਂ। ਸਿੱਧੂ ਦੇ ਤਾਜ਼ਾ ਹਮਲਿਆਂ ‘ਤੇ ਸੀਐੱਮ ਕੈਪਟਨ ਅਮਰਿੰਦਰ ਸਿੰਘ ਨੇ ਪਹਿਲੀ ਵਾਰ ਚੁੱਪ ਤੋੜੀ ਹੈ। ਇੱਕ ਨਿੱਜੀ ਚੈਨਲ ਨੂੰ ਇੰਟਰਵਿਊ ਦਿੰਦੇ ਹੋਏ ਕੈਪਟਨ ਨੇ ਕਿਹਾ, “ਮੈਨੂੰ ਤਾਂ ਪਤਾ ਹੀ ਨਹੀਂ ਕਿ ਸਿੱਧੂ ਕਿਸ ਪਾਰਟੀ ‘ਚ ਹੈ। ਜੇਕਰ ਉਹ ਕਾਂਗਰਸ ‘ਚ ਹੈ, ਤਾਂ ਇਹ ਸਰਾਸਰ ਅਨੁਸ਼ਾਸਨਹੀਣਤਾ ਹੈ।”
ਇਹ ਵੀ ਪੜ੍ਹੋ:- ‘ਗੁਰੂ’ ਹੋ ਗਏ ਸ਼ੁਰੂ ! ਇਸ ਵਾਰ ਸਿੱਧੇ ਕੈਪਟਨ ਅਮਰਿੰਦਰ ਸਿੰਘ ਨੂੰ ਘੇਰਿਆ !!!
‘ਕਿਤੇ ਹੋਰ ਜਾਣ ਦੀ ਤਿਆਰੀ ‘ਚ ਸਿੱਧੂ’
ਕੈਪਟਨ ਅਮਰਿੰਦਰ ਸਿੰਘ ਨੇ ਤਿੱਖੇ ਲਹਿਜ਼ੇ ‘ਚ ਕਿਹਾ, “ਹਰ ਦਿਨ ਓਹੀ ਗੱਲਾਂ ਸੁਣ-ਸੁਣ ਕੇ ਲੋਕ ਅੱਕ ਚੁੱਕੇ ਹਨ। ਉਸਦਾ ਕੋਈ ਏਜੰਡਾ ਨਹੀਂ ਹੈ। ਪਰ ਜੋ ਆਪਣੇ ਮੁੱਖ ਮੰਤਰੀ ਨੂੰ ਅਟੈਕ ਕਰ ਰਿਹਾ ਹੈ, ਮਤਲਬ ਸਾਫ਼ ਹੈ ਕਿ ਉਹ ਕਿਸੇ ਹੋਰ ਪਾਰਟੀ ‘ਚ ਜਾਣ ਦੀ ਤਿਆਰੀ ‘ਚ ਹੈ। ਜਿਥੇ ਵੀ ਜਾਣਾ ਹੈ, ਸਿੱਧੂ ਜਲਦੀ ਉਸ ਬਾਰੇ ਆਪਣਾ ਸਟੈਂਡ ਕਲਿਅਰ ਕਰੇ ਅਤੇ ਜਿੰਨਾ ਛੇਤੀ ਹੋ ਸਕੇ, ਚਲਾ ਜਾਏ।”
‘ਸਿੱਧੂ ਨੂੰ ਲੈਣ ਲਈ ਕੋਈ ਤਿਆਰ ਨਹੀਂ’
ਮੁੱਖ ਮੰਤਰੀ ਨੇ ਇਹ ਤਾਂ ਕਹਿ ਦਿੱਤਾ ਕਿ ਸਿੱਧੂ ਕਿਸੇ ਹੋਰ ਪਾਰਟੀ ‘ਚ ਜਾਣ ਦੀ ਤਿਆਰੀ ਕਰ ਰਹੇ ਹਨ। ਪਰ ਨਾਲ ਹੀ ਇਹ ਵੀ ਦਾਅਵਾ ਕੀਤਾ ਕਿ ਸਿੱਧੂ ਨੂੰ ਲੈਣ ਲਈ ਕੋਈ ਵੀ ਤਿਆਰ ਨਹੀਂ ਹੈ। ਕੈਪਟਨ ਨੇ ਕਿਹਾ, “ਬੀਜੇਪੀ ਨੇ ਉਸਨੂੰ ਲੈਣਾ ਨਹੀਂ, ਕਿਉਂਕਿ ਉਥੋਂ ਉਹ ਗਾਲ੍ਹਾਂ ਕੱਢ ਕੇ ਬਾਹਰ ਨਿਕਲਿਆ ਹੈ। ਅਕਾਲੀ ਦਲ ਨਾਲ ਵੀ ਗੱਲ ਨਹੀਂ ਬਣਨੀ। ਸੁਣਿਆ ਹੈ ਕਿ ‘ਆਪ’ ਨਾਲ ਗੱਲ ਚੱਲ ਰਹੀ ਹੈ। ਸੋ ਜਾਂ ਤਾਂ ਉਹ ਸਾਡੇ ਨਾਲ ਰਹੇਗਾ, ਜਾਂ ਉਥੇ ਜਾਵੇਗਾ।”
ਪਟਿਆਲਾ ਤੋਂ ਚੋਣ ਲੜਨ ਦਾ ਚੈਲੇਂਜ
ਇੰਟਰਵਿਊ ਦੌਰਾਨ ਜਦੋਂ ਸੀਐੱਮ ਕੈਪਟਨ ਅਮਰਿੰਦਰ ਸਿੰਘ ਨੂੰ ਨਵਜੋਤ ਸਿੱਧੂ ਦੇ ਪਟਿਆਲਾ ‘ਚ ਸਰਗਰਮੀਆਂ ਵਧਾਉਣ ਬਾਰੇ ਸਵਾਲ ਕੀਤਾ ਗਿਆ, ਤਾਂ ਉਹਨਾਂ ਸਿੱਧੂ ਨੂੰ ਆਪਣੇ ਖਿਲਾਫ਼ ਚੋਣ ਲੜਨ ਦਾ ਚੈਲੇਂਜ ਦੇ ਦਿੱਤਾ। ਕੈਪਟਨ ਨੇ ਕਿਹਾ, “ਸਿੱਧੂ ਸ਼ੌਂਕ ਨਾਲ ਮੇਰੇ ਖਿਲਾਫ਼ ਚੋਣ ਲੜ ਸਕਦੇ ਹਨ।” ਉਹਨਾਂ ਕਿਹਾ ਕਿ ਜੋ ਹਾਲ ਜਨਰਲ ਜੇ.ਜੇ. ਸਿੰਘ ਦਾ ਹੋਇਆ ਸੀ, ਓਹੀ ਸਿੱਧੂ ਦਾ ਹੋਵੇਗਾ। ਸਿੱਧੂ ਇੰਨੀ ਬੁਰੀ ਤਰ੍ਹਾਂ ਚੋਣ ਹਾਰਨਗੇ ਕਿ ਉਹਨਾਂ ਦੀ ਜ਼ਮਾਨਤ ਜ਼ਬਤ ਹੋ ਜਾਵੇਗੀ।
‘ਸਿੱਧੂ 4 ਸਾਲ ਪਹਿਲਾਂ ਆਏ, ਉੱਪਰ ਕਿਉਂ ਬਿਠਾਈਏ’
ਸੀਐੱਮ ਨੇ ਇਸ ਇੰਟਰਵਿਊ ‘ਚ ਪਹਿਲੀ ਵਾਰ ਉਹਨਾਂ ਕਿਆਸਰਾਈਆਂ ਦਾ ਜਵਾਬ ਵੀ ਦਿੱਤਾ, ਜਿਹਨਾਂ ‘ਚ ਕਿਹਾ ਜਾ ਰਿਹਾ ਸੀ ਕਿ ਸਿੱਧੂ ਪਾਰਟੀ ਪ੍ਰਧਾਨ ਜਾਂ ਡਿਪਟੀ ਸੀਐੱਮ ਦਾ ਅਹੁਦਾ ਚਾਹੁੰਦੇ ਹਨ। ਮੁੱਖ ਮੰਤਰੀ ਨੇ ਕਿਹਾ, “ਸਿੱਧੂ ਪਾਰਟੀ ਪ੍ਰਧਾਨ ਕਿਉਂ ਬਣਨਗੇ? ਜਾਖੜ ‘ਚ ਕੀ ਕਮੀ ਹੈ? ਬਤੌਰ ਪਾਰਟੀ ਪ੍ਰਧਾਨ ਉਹ ਚੰਗਾ ਕੰਮ ਕਰ ਰਹੇ ਹਨ।” ਇਸਦੇ ਨਾਲ ਹੀ ਕੈਪਟਨ ਬੋਲੇ, “ਸਿੱਧੂ ਨੂੰ ਡਿਪਟੀ ਸੀਐੱਮ ਵੀ ਕਿਉਂ ਬਣਾਇਆ ਜਾਵੇ। ਉਹਨਾਂ ਨੂੰ ਪਾਰਟੀ ‘ਚ ਆਏ ਸਮਾਂ ਹੀ ਕਿੰਨਾ ਹੋਇਆ ਹੈ। 4 ਸਾਲ ਪਹਿਲਾਂ ਸਿੱਧੂ ਪਾਰਟੀ ‘ਚ ਆਏ ਹਨ, ਜਦਕਿ ਕੈਬਨਿਟ ਦੇ ਹੋਰ ਮੈਂਬਰ ਲੰਮੇ ਸਮੇਂ ਤੋਂ ਪਾਰਟੀ ਨਾਲ ਜੁੜੇ ਹੋਏ ਹਨ, ਤੇ ਇਸ ਲਹਿਜ਼ੇ ਨਾਲ ਉਹ ਸਿੱਧੂ ਦੇ ਸੀਨੀਅਰ ਹਨ। ਇਸ ਲਈ ਕਿਸੇ ਜੂਨੀਅਰ ਨੂੰ ਉਹਨਾਂ ਦੇ ਉੱਪਰ ਨਹੀਂ ਬਿਠਾਇਆ ਜਾ ਸਕਦਾ।”
ਹਾਲਾਂਕਿ ਕੈਪਟਨ ਨੇ ਇਹ ਵੀ ਸਾਫ਼ ਕੀਤਾ, “ਇਸ ਬਾਰੇ ਕੋਈ ਵੀ ਫ਼ੈਸਲਾ ਬੇਸ਼ੱਕ ਹਾਈਕਮਾਨ ਵੱਲੋਂ ਲਿਆ ਜਾਣਾ ਹੈ, ਪਰ ਮੇਰੀ ਰਾਏ ਪੁੱਛੀ ਜਾਵੇਗੀ, ਤਾਂ ਮੈਂ ਇਹੀ ਕਹਾਂਗਾ ਜੋ ਅੱਜ ਕਹਿ ਰਿਹਾ ਹਾਂ।”
ਇਹ ਵੀ ਪੜ੍ਹੋ:- ਸਿੱਧੂ ਨੂੰ ਸਜ਼ਾ ਦੇਣਗੇ ਜਾਂ ਰਿਵਾਰਡ ਦੇਣਗੇ ‘ਰਾਜਾ ਸਾਬ੍ਹ’? ਕਾਂਗਰਸ ਸਾਂਸਦ ਨੇ ਪੁੱਛਿਆ ਸਵਾਲ
