ਬਿਓਰੋ। ਦੇਸ਼ ਭਰ ‘ਚ ਕੋਰੋਨਾ ਦੀ ਖ਼ਤਰਨਾਕ ਰਫ਼ਤਾਰ ਰੁਕਣ ਦਾ ਨਾੰਅ ਨਹੀਂ ਲੈ ਰਹੀ। ਸੋਮਵਾਰ ਨੂੰ 1,68,912 ਨਵੇਂ ਕੇਸ ਰਿਪੋਰਟ ਕੀਤੇ ਗਏ ਹਨ, ਜਦਕਿ 904 ਲੋਕਾਂ ਦੀ ਜਾਨ ਚਲੀ ਗਈ। ਕੋਰੋਨਾ ਮਾਮਲਿਆਂ ਦੇ ਇਹ ਅੰਕੜੇ ਜਿਹਨਾਂ ਸੂਬਿਆਂ ਤੋਂ ਜ਼ਿਆਦਾ ਸਾਹਮਣੇ ਆ ਰਹੇ ਹਨ, ਉਹਨਾਂ ‘ਚ ਪੰਜਾਬ ਵੀ ਇੱਕ ਹੈ। ਲਿਹਾਜ਼ਾ ਕੇਂਦਰ ਦੀ ਪੰਜਾਬ ‘ਤੇ ਪੂਰੀ ਨਜ਼ਰ ਹੈ।
ਕੇਂਦਰ ਸਰਕਾਰ ਵੱਲੋਂ ਪੰਜਾਬ ‘ਚ ਭੇਜੀਆਂ ਗਈ ਟੀਮਾਂ ਦੀ ਰਿਪੋਰਟ ਦੇ ਅਧਾਰ ‘ਤੇ ਕੇਂਦਰ ਸਰਕਾਰ ਨੇ ਇੱਕ ਵਾਰ ਫਿਰ ਸੂਬੇ ‘ਚ ਟੈਸਟਿੰਗ ਅਚੇ ਵੈਕਸੀਨੇਸ਼ਨ ਨੂੰ ਲੈ ਕੇ ਸਵਾਲ ਖੜ੍ਹੇ ਕੀਤੇ ਹਨ। ਪੰਜਾਬ ਸਰਕਾਰ ਨੂੰ ਭੇਜੀ ਚਿੱਠੀ ‘ਚ ਕੇਂਦਰੀ ਸਿਹਤ ਸਕੱਤਰ ਰਾਜੇਸ਼ ਭੂਸ਼ਣ ਨੇ ਕੁਝ ਜ਼ਿਲ੍ਹਿਆਂ ਵੱਲ ਖਾਸ ਧਿਆਨ ਦੇਣ ਦੀ ਲੋੜ ਵੱਲ ਜ਼ੋਰ ਦਿੱਤਾ ਹੈ। ਇਸ ਚਿੱਠੀ ‘ਚ ਕਿਹਾ ਗਿਆ ਹੈ:-
- ਪਟਿਆਲਾ ਅਤੇ ਲੁਧਿਆਣਾ ‘ਚ ਕਾੰਟੈਕਟ ਟ੍ਰੇਸਿੰਗ ‘ਤੇ ਵੱਧ ਧਿਆਨ ਦੇਣ ਦੀ ਲੜ ਹੈ। ਮੋਹਾਲੀ ‘ਚ ਮੈਨ ਪਾਵਰ ਦੀ ਕਮੀ ਦੇ ਚਲਦੇ ਕਾੰਟੈਕਟ ਟ੍ਰੇਸਿੰਗ ਅਤੇ ਨਿਗਰਾਨ ਦੀਆਂ ਕੋਸ਼ਿਸ਼ਾਂ ਪ੍ਰਭਾਵਿਤ ਹੋ ਰਹੀਆਂ ਹਨ। ਕਾੰਟੈਕਟ ਟ੍ਰੇਸਿੰਗ ਲਈ ਪਹਿਲ ਦੇ ਅਧਾਰ ‘ਤੇ ਹੋਰ ਮੈਨ ਪਾਵਰ ਲਗਾਉਣ ਦੀ ਜ਼ਰੂਰਤ ਹੈ।
- ਪਟਿਆਲਾ ਤੋਂ ਘੱਟ ਟੈਸਟਿੰਗ ਹੋਣ ਦੀ ਰਿਪੋਰਟ ਮਿਲੀ ਹੈ। ਟੀਮ ਦੇ ਮੁਤਾਬਕ, ਰੋਪੜ ‘ਚ ਕੋਈ ਵੀ RT-PCR ਲੈਬ ਨਹੀਂ ਹੈ। ਇਸ ‘ਤੇ ਤੁਰੰਤ ਧਿਆਨ ਦੇਣ ਦੀ ਲੋੜ ਹੈ।
- ਮੋਹਾਲੀ ਅਤੇ ਰੂਪਨਗਰ ਜ਼ਿਲ੍ਹਿਆਂ ‘ਚ ਕੋਈ ਵੀ ਕੋਵਿਡ ਹਸਪਤਾਲ ਨਹੀਂ ਹੈ। ਮਰੀਜ਼ਾਂ ਨੂੰ ਨੇੜਲੇ ਜ਼ਿਲ੍ਹਿਆਂ ਜਾਂ ਚੰਡੀਗੜ੍ਹ ਰੈਫ਼ਰ ਕੀਤਾ ਜਾ ਰਿਹਾ ਹੈ। ਮੋਹਾਲੀ, ਜਲੰਧਰ ਅਤੇ ਲੁਧਿਆਣਾ ਦੇ ਹਸਪਤਾਲਾਂ ‘ਚ ਬੈੱਡ ਭਰਨ ਦੀ ਦਰ ਜ਼ਿਆਦਾ ਹੈ, ਇਸ ਲਈ ਕੇਸ ਵਧਣ ਦੀ ਸੂਰਤ ‘ਚ ਸਿਹਤ ਵਿਭਾਗ ਨੂੰ ਤਿਆਰੀ ਰੱਖਣੀ ਪਏਗੀ।
- ਟੀਮਾਂ ਨੇ ਇਹ ਵੀ ਰਿਪੋਰਟ ਕੀਤਾ ਹੈ ਕਿ ਨਵਾਂਸ਼ਹਿਰ ‘ਚ ਵੈਂਟੀਲੇਟਰ ਦੀ ਖਰੀਦ ਸਬੰਧੀ ਵੀ ਕੁਝ ਦਿੱਕਤਾਂ ਹਨ। ਰੂਪਨਗਰ ‘ਚ ਵੈਂਟੀਲੇਟਰ ਉਚਿਤ ਮਾਤਰਾ ‘ਚ ਹੁੰਦੇ ਹੋਏ ਵੀ ਹੈਲਥਕੇਅਰ ਵਰਕਰਜ਼ ਦੀ ਕਮੀ ਦੇ ਚਲਦੇ ਇਸਤੇਮਾਲ ਨਹੀਂ ਹੋ ਰਹੇ। ਹੈਲਥ ਵਰਕਰਜ਼ ਨੂੰ ਠੇਕੇ ‘ਤੇ ਭਰਤੀ ਕੀਤੇ ਜਾਣ ਨਾਲ ਮਸਲਾ ਹੱਲ ਹੋ ਸਕਦਾ ਹੈ।
- ਪਟਿਆਲਾ, ਮੋਹਾਲੀ ਅਤੇ ਰੂਪਨਗਰ ‘ਚ ਵੀ ਹੈਲਥਕੇਅਰ ਵਰਕਰਜ਼ ਦੀ ਕਮੀ ਮਹਿਸੂਸ ਕੀਤੀ ਗਈ ਹੈ।
- ਪਟਿਆਲਾ ਅਤੇ ਲੁਧਿਆਣਾ ਦੀ ਟੀਮ ਨੇ ਵੈਕਸੀਨੇਸ਼ਨ ਦੀ ਧੀਮੀ ਰਫ਼ਤਾਰ ਬਾਰੇ ਵੀ ਰਿਪੋਰਟ ਕੀਤਾ ਹੈ। ਇਸ ਨੂੰ ਪਹਿਲ ਦੇ ਅਧਾਰ ‘ਤੇ ਵੇਖਣਾ ਹੋਵੇਗਾ।
- ਟੀਮਾਂ ਨੇ ਲੋਕਾਂ ਵੱਲੋਂ ਕੋਰੋਨਾ ਨਿਯਮਾਂ ਦੀ ਪਾਲਣਾ ‘ਚ ਲਾਪਰਵਾਹੀ ਬਾਰੇ ਵੀ ਰਿਪੋਰਟ ਕੀਤਾ ਹੈ। ਇਸਦੇ ਲਈ ਜ਼ਿਲ੍ਹਾ ਪੱਧਰ ‘ਤੇ ਸਖਤ ਪਾਬੰਦੀਆਂ ਲਗਾਏ ਜਾਣ ਦੀ ਸਲਾਹ ਦਿੱਤੀ ਜਾਂਦੀ ਹੈ।
