ਬਿਓਰੋ। ਕੋਰੋਨਾ ਦਾ ਨਵਾਂ ਵੈਰੀਏਂਟ ਓਮੀਕ੍ਰੌਨ ਭਾਰਤ ਵਿੱਚ ਲਗਾਤਾਰ ਟੈਂਸ਼ਨ ਵਧਾ ਰਿਹਾ ਹੈ। ਤਿੰਨ ਦਿਨਾਂ ਅੰਦਰ ਓਮੀਕ੍ਰੌਨ ਦੇ 4 ਕੇਸ ਸਾਹਮਣੇ ਆ ਚੁੱਕੇ ਹਨ। ਸ਼ਨੀਵਾਰ ਨੂੰ ਗੁਜਰਾਤ ਅਤੇ ਮਹਾਂਰਾਸ਼ਟਰ ਤੋਂ 2 ਮਾਮਲੇ ਸਾਹਮਣੇ ਆਏ ਹਨ। ਇਸ ਤੋਂ ਪਹਿਲਾਂ ਕਰਨਾਟਕ ਦੇ ਬੈਂਗਲੁਰੂ ਵਿੱਚ ਓਮੀਕ੍ਰੌਨ ਦੇ 2 ਮਾਮਲਿਆਂ ਦੀ ਪੁਸ਼ਟੀ ਹੋਈ ਸੀ।
ਮੁੰਬਈ ਤੋਂ ਸੰਕ੍ਰਮਿਤ ਮਿਲਿਆ ਸ਼ਖਸ ਸਾਊਥ ਅਫਰੀਕਾ ਤੋਂ ਵਾਪਸ ਪਰਤਿਆ ਸੀ। ਉਸਦੀ ਉਮਰ 33 ਸਾਲ ਹੈ। ਉਹ ਸਾਊਥ ਅਫਰੀਕਾ ਤੋਂ ਦੁਬਈ, ਫਿਰ ਦਿੱਲੀ ਅਤੇ ਉਥੋਂ 24 ਨਵੰਬਰ ਨੂੰ ਮੁੰਬਈ ਆਇਆ ਸੀ। ਉਸਨੇ ਅਜੇ ਤੱਕ ਕੋਰੋਨਾ ਦੀ ਵੈਕਸੀਨ ਨਹੀਂ ਲਗਵਾਈ ਹੈ। ਮੁੰਬਈ ਵਿੱਚ ਲੈਂਡ ਹੋਣ ਸਮੇਂ ਉਸਨੂੰ ਹਲਕਾ ਬੁਖਾਰ ਸੀ। ਇਸ ਤੋਂ ਇਲਾਵਾ ਉਸ ਵਿੱਚ ਕੋਰੋਨਾ ਦਾ ਕੋਈ ਹੋਰ ਲੱਛਣ ਨਹੀਂ ਵਿਖਿਆ।
ਗੁਜਰਾਤ ਦੇ ਜਾਮਨਗਰ ਤੋਂ ਵੀ ਓਮੀਕ੍ਰੌਨ ਦਾ ਇੱਕ ਕੇਸ ਸਾਹਮਣੇ ਆਇਆ ਹੈ। ਰਿਪੋਰਟ ਮੁਤਾਬਕ, ਇਹ ਸ਼ਖਸ ਜਿੰਬਾਬਵੇ ਤੋਂ ਭਾਰਤ ਪਰਤਿਆ ਹੈ। ਉਹ 28 ਨਵੰਬਰ ਨੂੰ ਅਹਿਮਦਾਬਾਦ ਏਅਰਪੋਰਟ ‘ਤੇ ਉਤਰਨ ਤੋਂ ਬਾਅਦ ਜਾਮਨਗਰ ਗਿਆ ਸੀ। ਉਸਦੇ ਓਮੀਕ੍ਰੌਨ ਨਾਲ ਸੰਕ੍ਰਮਿਤ ਹੋਣ ਦੀ ਪੁਸ਼ਟੀ ਜੀਨੋਮ ਸੀਕਵੈਂਸਿੰਗ ਟੈਸਟ ਰਾਹੀਂ ਹੋਈ ਹੈ।
ਦੱਖਣੀ ਅਫਰੀਕਾ ਤੋਂ ਚੰਡੀਗੜ੍ਹ ਪਰਤੀ ਮਹਿਲਾ ‘ਤੇ FIR
ਚੰਡੀਗੜ੍ਹ ਵਿੱਚ ਦੱਖਣੀ ਅਫਰੀਕਾ ਤੋਂ ਪਰਤੀ ਇੱਕ ਮਹਿਲਾ ਖਿਲਾਫ਼ FIR ਦਰਜ ਹੋਈ ਹੈ। ਇਸ ਮਹਿਲਾ ‘ਤੇ ਹੋਮ ਕੁਆਰੰਟੀਨ ਨਿਯਮਾਂ ਦੀ ਪਾਲਣਾ ਨਾ ਕਰਨ ਦਾ ਇਲਜਾਮ ਹੈ। ਦੱਸ ਦਈਏ ਕਿ ਕੋਰੋਨਾ ਵਾਇਰਸ ਦੇ ਓਮੀਕ੍ਰੌਨ ਵੈਰੀਏਂਟ ਨੂੰ ਲੈ ਕੇ ਦੱਖਣੀ ਅਫਰੀਕਾ ਹਾਈ ਰਿਸਕ ‘ਤੇ ਹੈ। ਚੰਡੀਗੜ੍ਹ ਦੇ ਸਿਹਤ ਸਕੱਤਰ ਅਤੇ ਨੋਡਲ ਅਫਸਰ ਯਸ਼ਪਾਲ ਗਰਗ ਨੇ ਦੱਸਿਆ ਕਿ ਮਹਿਲਾ 1 ਦਸੰਬਰ ਤੋਂ ਦੱਖਣੀ ਅਫਰੀਕਾ ਤੋਂ ਪਰਤੀ ਹੈ। ਇਸਦਾ RT-PCR ਟੈਸਟ ਕਰਵਾਇਆ ਗਿਆ, ਜਿਸਦੀ ਰਿਪੋਰਟ ਨੈਗੇਟਿਵ ਆਈ। ਹਾਲਾਂਕਿ ਪ੍ਰੋਟੋਕੋਲ ਦੇ ਮੁਤਾਬਕ, ਉਸ ਲਈ 7 ਦਿਨਾਂ ਤੱਕ ਹੋਮ ਕੁਆਰੰਟੀਨ ਰਹਿਣਾ ਲਾਜ਼ਮੀ ਸੀ, ਪਰ 2 ਦਸੰਬਰ ਨੂੰ ਹੀ ਉਹ ਇੱਕ ਹੋਟਲ ਵਿੱਚ ਚਲੀ ਗਈ।
ਦੁਨੀਆ ਦੇ 38 ਦੇਸ਼ਾਂ ਤੱਕ ਪਹੁੰਚਿਆ ਓਮੀਕ੍ਰੌਨ
ਦੱਸ ਦਈਏ ਕਿ ਕੋਰੋਨਾ ਦਾ ਇਹ ਨਵਾਂ ਵੈਰੀਏਂਟ ਹੁਣ ਤੱਕ ਭਾਰਤ ਸਮੇਤ ਦੁਨੀਆ ਦੇ 38 ਦੇਸ਼ਾਂ ਤੱਕ ਪਹੁੰਚ ਚੁੱਕਿਆ ਹੈ। ਇਹਨਾਂ ਵਿੱਚ ਕੈਨੇਡਾ ਵੀ ਸ਼ਾਮਲ ਹੈ, ਜਿਥੇ ਓਮੀਕ੍ਰੌਨ ਦੇ ਇਕੱਠੇ 15 ਮਾਮਲੇ ਸਾਹਮਣੇ ਆਉਣ ਨਾਲ ਹੜਕੰਪ ਮਚ ਗਿਆ ਹੈ। ਕੈਨੇਡਾ ਵਿੱਚ ਸਾਹਮਣੇ ਆਏ ਇਹਨਾਂ ਮਾਮਲਿਆਂ ਨੇ ਭਾਰਤ ਖਾਸਕਰ ਪੰਜਾਬ ਦੀ ਵੀ ਚਿੰਤਾ ਵਧਾ ਦਿੱਤੀ ਹੈ, ਕਿਉਂਕਿ ਕੈਨੇਡਾ ਤੋਂ ਵੱਡੀ ਗਿਣਤੀ NRIs ਦਾ ਭਾਰਤ ਆਉਣਾ-ਜਾਣਾ ਜਾਰੀ ਰਹਿੰਦਾ ਹੈ।
